Realizou-se onte i hoije l Raide TT ourganizado por la Associaçon de motards “Arribas de l Douro” de Sendin. Onte houbo la eisebiçon de carros i motas, que fazírun bários eisercícios i a la nuite houbo la cena ne l salon de la Junta de Freguesie.
Stubírun persentes muitos motards de muitas tierras de Pertual i tamien de Spanha.
L porparatibo para la salida
Hoije purmanhana houbo l zaiuno i apuis todos se porparórun para dar la buolta por ls caminos de Sendin i alredores. Alguns spormentórun las sues máquinas i l bruído era por bezes algo mais fuorte, mas la ourganizaçon i la guarda alhá fazírun que todo corrísse bien.
La fileira de ls partecipantes
Ajuntórun-se todos na Abenida de l Ciclo, acerca de ls bumbeiros i cun estes a dar l apoio, cumo siempre acuntece, i a oucupáren l fin de la fileira, cun l jeep de la ourganizaçon atrás.
Carlos Martins cun la sue moto-4 i cumo un de ls responsábles por la ourganizaçon, iba dando las ourientaçones.
Carlos Martins
Todo an orde i por las onze, salírun para mais un die de fiesta i cumbibio por ls caminos i cun l almuorço ne l campo. L die staba friu i habie un merujeiro, mas todo corriu bien. A la nuita, musica i cumbíbio ne l salon.
L fin de la fileira
Ye cun estas cousas, feitas por ls que acá stan, que Sendin bibe i se bai mostrando al mundo. Que ls que stan fuora mos mánden l sou apoio i la sue amisade.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
