Las eiquipas
Mais un jogo del çtrital de futebol de la AFB i l Sendin ganhou por 4-1. L campo staba mesmo mui cheno d’auga por bias de l tiempo de chuba de ls últimos dies, mas cumo la tarde staba de Sol i scorriu algo antes de ampeçar l jogo, quedou cumo todos ls campos de tierra, an dies destes i an que se ténen que fazer ls jogos.
L Sendin dominou toda la purmeira parte
Mais ua jogada de peligro
L Sendin soubo jogar melhor cul campo assi yá que ye l que ten, mas ls jogadores del Alfandega cun un campo de yerba, son mais fidalgos i tenien deficuldade an jogar cul campo assi. L Sendin jogaba siempre subre l campo de l Alfandega i lougo chegou als 3-0.
Na segunda parte fui eigual
L Sendin marca l quarto golo
L Alfandega inda fizo l 3-1, mas nada adelantrou porque l Sendin staba nun die an que todo l salie bien i solo nun marcou mais dous ou trés golos porque la bola staba molhada i las botas chenas de tierra, l que deficultaba ls jogadores.
La alegrie del golo
Fui buona para l Sendin esta bitória yá que stamos nel ampeço de la segunda buolta del campeonato i hai que ganhar mais jogos para quedar nel lugar que l Sendin merece.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
