Al ber un retrato de Cicuiro, tirado por Alcides, un tiu de Cicuiro i tamien porque l blog de Tiégui - http://cicuiro.blogspot.com/ - ten alhá un link para L HOIJE i inda porque L HOIJE yá ye lido por muita giente de todas las aldés, pensei screbir hoije, algo subre Cicuiro.
Cicuiro
Leite de Vasconcelos (est. de filol. mir. I, 38) eidenteficou, la «billa Santi Johanis» mencionada nas Anquiriçones de 1258, cula atual aldé de S. Joanico, ne l cunceilho de Bumioso. La forma deminutiba deste nome torna pouco probable la eidenteficaçon. Se eisistiu i eisiste un S. Juanico, ye porque eisistiu un S. Juan, de que depende l nome i que probablemente quedarie acerca de S Juanico. Anclino-me a crer que se trata de la freguesie de Cicuiro, ne l cunceilho de Miranda, cujo ourago ye cun eifeito S. Juan Batista, mas quien sou you para tener rezon?
La casa del abade, an 2004
Cicuiro fui abadie de la apersentaçon del Patroado Real, mas l abade fui a bibir para Infainç i hoije, cun la falta que hai de padres, yá nin missa ten todos ls Demingos. Mas Cicuiro ten muitas outras cousas, que fázen deilha ua de las mais mirandesas aldés de l Praino. La sue giente respeitadora i amiga son la sue maior riqueza. Quien nun oubiu falar nas cereijas de Cicuiro? Fui alhi que, inda garoto, bi las purmeiras cereijas meio brancas i amarielhas.
Ua cereijeira de las brancas
Ye ua tierra onde nunca faltou l’auga i de las melhores del Praino.Mas para saberdes mais de Cicuiro besitai l sou blog, que you bou a ber todos ls dies. Fala de la giente de Cicuiro, de las cousas i fiestas de la aldé. Bale la pena besitar - http://baglina.blogspot.com/ -.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
