Durante anhos i anhos todas las aldés tenien pouliteiros i danças mistas ou pul menos dançában-se las danças tradicionales alhá. Miranda nun tenie nada dessas cousas i se bien dançar, era porque ls grupos de las aldés íban alhá. Nin l mirandés se falaba na cidade.
L rancho
Mas ls tiempos demudórun muito i cun la ida de la giente de ls pobos cercanos para la cidade, onde fazírun casa, tornou la cidade mais mirandesa ne ls usos i questumes. I hoije yá se fala mirandés por las rues de la cidade, mas ls serbicios de la câmara i del stado inda nun acumpanhórun la nuoba realidade.
Ua dança de ruoda
Las pessonas de la cidade, que benírun de las aldés, assi cumo ls filhos, ampeçórun a criar grupos de pouliteiros i de danças mistas i hoije, yá ls maiores ténen tamien un rancho de danças i cantares tradicionales. L HOIJE yá acumpanhou todos ls grupos i podemos dezir que son cumo ls melhores del cunceilho.
Ua dança aparelhada
Quando se diç que na cidade nun se fala l mirandés, stamos a querer anganharmos ou a querer anganhar ls outros. La giente de las aldés trouxo la sue léngua i las sues tradiçones para la cidade i ye neilha que stan tamien ls melhores grupos de l cunceilho i la cultura mirandesa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
