Comemora-se hoije l 35º anibersairo de la reboluçon i l HOIJE tamien se quier associar a la comemoraçon i por esso scribo este pequeinho testico, porque grandes testos son para panelas grandes i la mie ye pequeinha. Tamien nun puode ser mui grande, porque las comemoraçones, an Sendin, fúrun pequeinhas. Apuis que uns poucos de anteletuales, que se dízen de squierda, mas que solo pénsan neilhes i nada adelántran para l PIB, la giente fui-se afastando de las comemoraçones. La giente quier trabalho, quier amprego, quier de comer.
Mas quiero deixar eiqui dues mensages, la purmeira ye para ls sendineses que tubírun parte atiba ne l die 25 de Abril, dében ser lembrados i tubimos-los a la frente de las comunicaçones – Manuel Guerra, a comandar la tomada de la telbison – Teófilo Bento i antegrados ne ls grupos ouperacionales – António Almendra. La segunda para ls que apuis de l 25 de Abril cuntinuórun ls eideales de Abril, cumo l purmeiro Persidente de Junta de Sendin ( pul partido socialista, na altura de squierda ) – José Almendra i todos quantos trabalhórun i trabálhan para que la reboluçon cuntíne i nunca tubírun férias ( nun antendo porque se hade dezir bacanças) i para ls moços ( tamien nun antendo porque se hade dezir jobes ) que cuntínan a tener spráncia nua bida melhor.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
