Fui hoije la fiesta de la Trindade , ua fiesta que ten las sues caratelisticas própias cumo yá muitas bezes l tenemos dito, mas poucas bezes se fala de la berdadeira rezon de la fiesta atual que ye la fiesta relegiosa an hounor de la Santíssima Trindade.
La missa
Cumo la capielha ye nun cabeço, de ls mais altos de Praino, adonde se ancontra la capielha de la Santíssima Trindade i esta ye pequeinha para cabéren todos ls que ban a la fiesta i quíeren rezar a la SS Trindade , fázen ua missa campal, que ye tamien ua cousa ancantadora, cun l’altar i las eimages, ne l meio de ls sobreiros.
Ye un ancanto la missa campal
A seguir a la missa hai la precisson que ye tamien un ato solene, mas que amostra bien la deboçon de la giente de l Praino a la SS Trindade. Bielhos i nuobos, acumpánhan las eimages, que al toque cumpassado de la banda de musica, que ye siempre la de Miranda, dan la buolta a la capielha, cun ls standartes delantre.
Ye magestosa la percion
Screbi de trés modos la palabra procisson, porque ye de ls trés modos que se diç an Tierras de Miranda i esta ye ua fiesta de l Praino. Mas adonde ls pobos de las bárias tierras quíeren amostrar, an que ounidos pula fé, las sues çfréncias i la sue eidentidade cultural.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
