La scuola de l purmeiro ciclo de Sendim yá ten nuobas casas de banho, deziemos casas de banho, porque d’atrás nun se usaba esso, yá que la giente fazie las necidades pul campo, ne l mirandés nun tengo conhecimiento de l nome.
La de ls ninos
Mas para quien studou la stória sabe que l mundo demuda muito i muitas bezes passa por tiempos de miséria que fázen andar para trás ciertas regiones, mas son cousas passageiras, yá que l porgresso ye einebitáble.
La de las ninas
Falei na stória para bos dezir que eiqui, hai mais de 2 000 anhos yá habie giente que sabie ler i habie sítios para las pessonas fazéren las necidades, chamában-le latrinas, era l tiempo de l ampério romano. Apuis bieno un tiempo de miséria i guerras i todo demudou, mas houbo siempre períodos buonos i malos.
La de ls porsores
Hoije stamos an tiempos de porgresso, inda que cun deficuldades i nun hai que andar siempre cun lamentaçones, hai que trabalhar i mirar alantre, que l feturo ye siempre melhor, se nun fur para nós será para ls nuossos filhos i nietos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
