La tierra yá iba toda gretada i chena d’angurrias, la sequidade fazie-le l que la belheç faç a la piele de la giente. Mas al cuntrairo de la giente que nun achou inda un modo de se regenerar i acaba por se morrer, la natureza rebeza las staçones del tiempo i bai arranjando siempre modo de fazer cun que la bida cuntine.
L’home ye un ser cunserbador por natureza, siempre cuntrairo a la própia natureza, julga-se Dius i quier cuntinar a mantener-se tel cumo ye i acaba morrendo, nun se trasforma, nun muda, solo eibelue porque la natureza l bai oubrigando als poucos.
Pus ende stá la chuba que bem a regar la tierra, a amolece-la, a amerosá-la, para recenir las semientes que han de dar cuntinidade a la bida.
