25 de ABRIL – 2012
Ne l Praino tamien se comemorou l 25 de Abril, fui na nuite de 24 para 25, an Atanor, la tierra que yá ye ua refréncia na cultura de l nordeste de Pertual.
Houbo un debate subre l 25 de Abril i cul tema “L que fai falta”. Houbo cantigas de Abril.
Nun houbo formalismos, apareciu quien quijo i la mesa de l debate fui feita na hora, yá que la associaçon “Lérias”, la ourganizadora de l debate, quijo assegurar lhibardade de partecipaçon. Para ua melhor metodologie de las anterbençoes i melhor moderar ls temas, para alhá de l moderador de la associaçon, stubírun na mesa; l persidente de la cámara de Miranda de l Douro, maior repersentente democrático de ls mirandeses; l persidente de la Copratiba Ribadouro de Sendin, maior anstituiçon agrícola de l Praino; l persidente de la Junta de Freguesie de Atanor i l persidente de la Junta de Palaçuolo, sede de la associaçon “Lérias” i andustrial. Bárias associaçones i anstituiçones, cumo la AEPGA , la ALDEIA i muita mocidade de todo l Praino, assistírun i partecipórun cun las sues anterbençones. L bideo ye ua amostra.
Acabado l debate, yá passada que era la meia nuite, João Queiroz deliciou a todos culas cançones de Abril.
Tenemos que ser nós, eiqui, ne l Praino, cula nuossa giente, a praticar i a bibir la nuossa cultura, a ser mais anterbentivos, a ser mais lhibres i respunsables. A amostrar que tenemos massa crítica.
Fui l’ampercípio de ua nuoba era ne l Praino…
