LA FRAUGA (Associação Para o Desenvolvimento de Picote)
Apersentar a la populaçon ls resultados de dous anhos d'ambestigaçon na ária de la Etnobotánica de la region de Miranda de l Douro, fui l'oubjetibo de l Seminário de Etnobotánica i Recursos Begetales, que decorriu hoije an Bergáncia. Esta eniciatiba resulta de la parcerie antre la Frauga (Associaçon pa l Zambolbimiento Antegrado de Picuote) i la Scuola Superior Agrária.
Na plateia stubírun 36 partecipantes, zde porsores de l'ansino secundairo, porsores de l'ansino superior, studantes, técnicos de bários ourganismos ligados a la Natureza , propiatairos de pequeinhas ampresas, a antropólogos, i arqueólogos. L'oujetibo fui dar a coincer l trabalho de dous anhos pa la cunserbaçon de la biodibersidade de la region mirandesa. Pa l persidente de la Frauga , Jorge Lourenço, este trabalho pretende ancentibar l retomar de l cultibo d'alguas plantas medicinales i gastronómicas, que se fui perdendo al longo de l tiempo. Este seminairo ye l culminar dua de las açones que staba prebista ne l porjeto aprobado pul ON2, ne l ámbito de l CREN, de la geston de spácios protegidos, i que tenie prebisto na fase final de l porjeto, un seminairo adonde podíssen ser çcutidas i abordadas las questones de la Etnobotánica an to la tierra de Miranda.
L porjeto eirá culminar na eidiçon dun catálogo de speces de Etnobotánica de la tierra de Miranda, i nun libro de receitas d'usos gastronómicos i medicinales i bai prolongar-se até 2013, atrabeç de l'apoio de l fondo EDP pa la biodibersidade.
