Ne l próssimo més quedaran cuncluídos ls trabalhos de requalificaçon ourbana ne l centro stórico de Miranda de l Douro. Son quatro ampreitadas que stan a decorrer. “Ua deilhas ten a ber cula rue de l’Alfándiga i la Praça. Tenemos tamien l Bárrio Berde, l Bárrio de la Terronha i l de Santa Lhuzie. Stá todo prebisto para que ne l final de l més de Agosto stéian cuncluídas”, dixo l persidente de la cámara, Artur Nunes.
Depuis de cuncluídas estas anterbençones, la cidade bai a quedar de cara lhabada.
A la rue de l Barrio yá fui dado l nome de “Ex-Combatentes” i yá alhi se ancontra ua lápide culs nomes de ls mirandeses que morrírun na guerra de l Ultramar.
