amadeu · 17/01/2007

014 – Cunjugaçon de ls berbos an –ar

1. De ls berbos mirandeses de tema an –a ou berbos an que l anfenitibo ampessonal acaba an –ar, tamien chamados de la 1ª cunjugaçon, falamos hoije solo daqueilhes que son anteiramente rigulares, quier dezir, aqueilhes an que la raiç nunca demuda. Cumo tal, apersentamos a seguir la cunjugaçon de l berbo beilar, i podemos ber que la raiç beil- se manten an todos ls tiempos.

Mas hemos de ber que son muitos ls berbos an –ar que demúdan la raiç an bários tiempos de la cunjugaçon. Esses son berbos eirrigulares i nun bai a ser possible tratar de cada un deilhes an classes defrentes. Por esso, un die destes, bamos a ampeçar a publicar un pequeinho dicionário de berbos cunjugados, que será un modo mais fácele de los daprender ou, al menos, de tirar dúbedas, amostrando an cada causo las eirrigularidades que ten. La Cumbençon Outográfica de la Lhéngua Mirandesa, para alhá de la cunjugaçon rigular [berbo cantar, p. 37], solo mos apersenta la cunjugaçon [eirrigular] de l berbo dar. Nun ye defícele de antender que la Cumbençon nun podie tratar de la cunjugaçon de todos ls berbos eirrigulares, yá que hai muito.

Assi i todo, bamos a dedicar, mais alantre, algues classes a outros berbos cumo ls que acában an –uar / -oar, i als que acában an –iar i an –ear, que a la bezes son defíceles de çtinguir i ténen specialidades amportantes de cunjugaçon.

Na cunjugaçon de ls berbos, por mais facelidade de sposiçon, bamos a seguir la debison an modos i an tiempos tal i qual cumo stá apersentada na Cumbençon Ourtográfica de la Lhéngua Mirandesa.

2. Cunjugaçon de l berbo beilar:

ANDICATIBO Persente

beilo

beilas

beila

beilamos

beilais

béilan Amperfeito

beilaba

beilabas

beilaba

beilábamos

beilábades

beilában

Feturo

beilarei

beilarás

beilará

beilaremos

beilareis

beilaran

Pertérito Perfeito

beilei

beileste

beilou

beilemos

beilestes

beilórun

Pertérito Mais Que Perfeito

beilara

beilaras

beilara

beiláramos

beilárades

beiláran

CUNJUNTIBO

ANFENITIBO

Persente

beile

beiles

beile

béilemos

béiledes

béilen

Amperfeito

beilasse

beilasses

beilasse

beilássemos

beilássedes

beilássen

Feturo

beilar

beilares

beilar

beilarmos

beilardes

beiláren

Pessonal

beilar

beilares

beilar

beilarmos

beilardes

beiláren

Ampessonal

beilar

CUNDICIONAL

beilarie

beilaries

beilarie

beilariemos

beilariedes

beilarien

GERÚNDIO

beilando

PARTECIPIO PASSADO

beilado

AMPERATIBO

-

beila

beile

-

beilai

-

3. Pequeinha lista de berbos que se cunjúgan cumo beilar

acrecentar

acumpanhar

acumparar

acupar

acusar

adebinar

adelantrar

adomar

agabar

amar

ambaraçar

amentar

ampeçar

amportar

ampregar

ampressionar

amuntonar

ancantar

anclinar

ancundesar

andinar

anfadar

anfeixar

anflamar

anforcar

anganhar

ansinar

ansopar

antregar

anxugar

apoucar

aquestumar

arar

armanar

arrasar

arrastrar

sperar

assossegar

atar

ateimar

belar

benerar

bingar

bolar

botar

caminar

cansar

cantar

casar

cegar

chamar

cheirar

chiçcar

chiçpar

chorar

circar

cortar

cumpletar

cuncertar

cuntar

cuntentar

cuntinar

cuntratar

çprumar

danhar

eignorar

eigualar

ferrar

filar

fungar

furar

gustar

lhabar

lhançar

lhargar

lhebantar

lhembrar

mirar

oubrigar

oumentar

ourdenar

pensar

perdonar

pesar

podar

preguntar

purparar

quedar

rapinar

roubar

salbar

saludar

scuitar

sonhar

spalhar

sparbar

spantar

stimar

stranhar

sustentar

telincar

tembrar

zanganhar

zanterrar

zarranjar

zgustar

znudar

4. L amperativo solo ten formas própias na 2ª pessona de l singular i na de l plural, formadas zde l persente de l andicatibo sin l –s de la fin. Assi i todo, resolbimos apersentar siempre la 3ª pessona de l singular cunjugada a la par de las outras, yá que ye mui ousada por bias de ls modos de tratamiento de respeito que séian na 3ª pessona, cumo se passa ne l sendinés. Eisemplos, ousando l berbo beilar:

- á pai, beile el solo que nós yá stamos cansados.

- á mai, beile eilha un cachico a ber se inda ye capaç.

Se mirarmos para esta forma de 3ª pessona, bemos que eilha ye scada de l persente de l cunjuntibo, l que se dá cun to las outras que nun séian própias de l amperatibo. Este, cunjugado an todas las pessonas, quedará assi: beila (tu), beile (eilha/el), béilemos (nós), beilai (bós), béilen (eilhas/eilhes).

5. Las formas de la cunjugaçon de ls berbos rigulares an –ar nun eisígen grandes splicaçones. Assi i todo hai algues deilhas que ténen l sonido mui aparecido i muito son cunfundidos na scrita. Dende que haba que dezir algues palabras subre essas formas, que ténen a ber cula 3ª pessona de l plural. Cuido que l melhor modo de las splicar ye acumparar essas formas culas mesmas formas de l pertués, yá que las desinéncias son aparecidas.

1º causo:

mirandés

pertués

persente de l andicatibo

béilan

bailam

persente de l cunjuntivo

béilen

bailem

2º causo:

mirandés

pertués

feturo de l andicatibo

beilaran

bailarão

pertérito mais que perfeito

beiláran

bailaram

feturo de l cunjuntibo i anfenitibo pessonal

beiláren

bailarem

3º causo:

mirandés

pertués

pertérito perfeito

beilórun

bailaram

Neste redadeiro causo, la tendéncia, na scrita, ye para cunfundir ou aprossimar la redadeira sílaba de la desinéncia de l mesmo tiempo ne l pertués, de modo que hai que star cun atento.

6. L persente de l cunjuntibo ten benido a sufrir algues pressones quanto a la sue cunjugaçon, yá que hai ua tendéncia para demudar l assento i torná-lo armano al de l pertués, subretodo na 1ª i na 2ª pessonas de l plural.

Assi, hai ua tendéncia pa la forma béilemos passar a beilemos i pa la forma béiledes passar a beileis. Dambas a dues son ousadas.

Assi i todo, estas segundas formas inda son menos ousadas i cuido que debemos de mantener las formas oureginales mirandesas.

7. Nesta classe de berbos an –ar, l feturo de l cunjuntibo i l anfenitibo pessonal ténen formas armanas na sue cunjugaçon, inda que se çtingan bien pul sou uso, que nun lhebanta porblemas, cumo se bei pul eisemplo:

- se beilarmos [feturo de l cunjuntibo] tan bien cumo el, esso talbeç mos anime a beilarmos [anfenitibo pessonal] inda melhor.

8. Ua redadeira nota para chamar l’atencion subre alguns assentos de las formas de la 3ª pessona de l plural, acabadas an –n [anquanto nun dirmos, de modo zambolbido, las regras de l’assentuaçon]:

- se fúren agudas [assentuadas na redadeira sílaba] nun lhieban assento: beilaran, beilarien;

- se fúren grabes [assentuadas na penúltima sílaba] lhieban assento: béilen, beilában, beilórun, beiláran, béilen, beilássen, beiláren.

17 de Janeiro de 2007

Amadeu Ferreira