amadeu · 03/12/2006

Eisercício (4) cun poema andrento - resoluçon

La boç de Miranda

You nun sou you.

Chamo-me Manuel, mas nun sou Manuel;

Nun me chamo Marie, mas sou tamien Marie.

Ponírun-me un nome, mas son todos ls nomes

De ls homes i de las mulhieres .

De la squina de l Nordeste.

Sou la boç de la tierra an que naci i me criei!

Toda la tristeza

De la giente [gente] mirandesa

Ye mar que m'antrou n'alma

I me roubou la calma

Sien [sin] modo nien [nin] lei!

Mar que fizo de mi un campo de batalha,

I anda cumigo a las buoltas

Por caminos i atalhos que nien [nin] sei!

- Gritos que crécen,

I de tanto gritar çfalhécen,

Óndias que ban, óndias que bénen!­

A que me cumpararei?

Sou la boç de Miranda

(Cumo un pobrezico [probezico, probico], roto, muorto, sfameado,

Que pide un cacho de pan, un palheiro, ua croua)

A gritar para Lisboua:

Á que dal [de l] rei! A que dal [de l] Rei!

Manuel Preto

Notas a la scrita de l testo

1. Antre parénteses retos [] deixo scritas alternatibas.

2. L nome pertués Manuel diç-se an Mirandés Manuol. Hai uns anhos para acá tamien se ten benido a ousar la forma familiar pertuesa Manel. Ne l causo de l testo, l outor stá a referir-se al sou nome, l que stá ne l Registro Cebil, i esse solo puode ser Manuel, pus l Registro Cebil stá an pertués, cumo sabemos.

3. La forma çfameado supon la reduçon de desfameado, l que nun stá tan cierto, anque essa forma se use muito na fala. La forma mais cierta ye sfameado, reduçon de esfameado (ber la licion 010).

4. La forma mais ousada an mirandés ye probe, dende que ls deminutibos puodan ser probezico ou probico [esta forma ye l'ousada an Sendin].

5. L grito pertués de pedido de ajuda «aqui del rei», nun ten correspundença direta an mirandés, yá que nesta lhéngua se diç siempre Á que de l (ou dal) rei [Cumo yá nun hai reis por acá, tamien se diç muito Á que de la guarda].

6. Se inda quedáren dúbedas, nun deixeis de las poner.

03 de Dezembre de 2006

Amadeu Ferreira