amadeu · 10/04/2007

Este eisercício era para quedar resolbido até al die 30 de Márcio, mas cumo se metírun pul meio las fiestas de Páscoa, asperei mais uns dies até que passara l tiempo de l Folar, assi dando la possiblidade a mais pessonas de respundéren.

Este testo, cumo ye fácele de ber, ten algues formas de l mirandés raiano. La correçon que eiqui deixo respeita essa bariadade de mirandés, mas pongo antre [] la forma de l mirandés central, se fur l causo.

La nina

Yera [era] num daqueilhes meses,

quando cantaba la rolha,

i a certas ninas pequeinhas,

Qualquier cousa se l’antolha.

Habie cumprado mieu [miu] pai

un tagalhico d’oubeilhas,

i fumus, you, i la nina,

alhá pa l monte cun eilhas.

Lhebemos nuossa merenda,

Yera [era] de trigo bien guapo,

para cenar a la nuite.

Las castanhuolas nun saco.

L die staba mui cralo [claro],

l monte cheno de froles [flores];

los [ls] paixaricos cantában

las sues cantigas d’amores.

La nina apanhaba froles,

i arranjaba sous ramicos,

i cantaba sues cantigas

a par de los [ls] paixaricos.

Cada cousa que fazie

la palumbica einocente

cumo éran sien malícia,

fartaba de rir la giente.

Yá quaije al anuitecer

eilhi al balhe de l pino,

ampuntei-la para casa

I perdiu-se no [ne l] camino.

You cuidei qu’eilha hab’rie ido

dreitica a tener a casa

num me tornei acordar

de la buona la rapaza.

Mie mai cuidando que staba

cumigo bien recolhida,

i eilha l’alma de Dius

toda la nuite perdida.

Ai... Ai... mie nina de l’alma?...

para dezir la berdade,

solo de you lo [l] cuntar

Dá-me muita senhardade.

Apareciu al outro die

arrimadica a ua squina

toda rouca de chorar

la cuitadica la nina.

Naide deixe assi anjicos

solos al Dius te me dou,

puode suceder [açuceder] a muitos

lo [l] que a esta le passou.

Francisco Meirinhos

Notas subre l bocabulairo ousado:

- rolha [pertués rola] ye l nome mais ousado, mas usa-se tamien rola [cumo tal an Sendin];

- cralo – metátese de claro.

- castanhuolas eiqui ten l sentido de patatas/batatas, que yá nun ye ousado.

- abrie forma de berbo haber, haberie.

- senhardade palabra que yá nun ye ousada i tem l sentido de pena, tristeza.

10 de Abril de 2007

Amadeu Ferreira