amadeu · 18/11/2007

Eisercício –lhembrar 006 - Resoluçon

Anque cun un cachico de atraso, eiqui queda la resoluçon deste eisercício, inda mui bolbido para l daprender la cunjugaçon de ls berbos. Bonda ler las repuostas para ber que bai habendo ua buona eiboluçon.

Desta beç quiero solo chamar l’atençon pa l amprego de bun(s)/buono(s) i pala cunjugaçon de ls berbos an –iar i an –ear, neste casos por eisemplo, ls berbos barear i bariar, i ls berbos aplaquiar i zgraciar.

Eiqui queda la mie repuosta, chamando l’atençon que nun caso ou outro serie possible un defrente tiempo de berbo.

1. Onte eilhes arrebalórun pulas peinhas un bun cacho, mas runpírun las calças de pana que benírun de Spanha hai uns buns anhos, yá de l tiempo an que ls cuntrabandistas íban i benien pula nuite, cun grima de séren agarrados puls guardas. Tiempos malos, que nun deixórun sauidades, al menos als que nun tenien outro modo de ganhar la bida.

2. Diç l dito que puls Santos píngan ls trampos, talbeç por bias de las augas que benien siempre ne l outonho, mas para que ls paixaricos síntan friu i témbren ye perciso que haba giladas fortes: por muitas que béngan nunca seran de mais para se curáren bien ls fumeiros.

3. Ne ls magostos, las castanhas nun árden cumo la lheinha, mas ássan-se i quédan cula casca queimada, mas quien soubir çcascá –las i fazir bilhós que, datrás, serbien pa las pessonas se zaiunáren, ampurrados por un buchico de augardiente bien fuorte.

4. Ua pessona bai por ende i yá solo se béien i óuben cousas de l Natal; que amporta l Natal se houbir pessonas que sínten que ténen oubrigaçon de cumprar algo? Quantas nun se arrependírun yá de mercar cousas que na fin nun sírben para nada i nin sequiera chéiran al Natal.

5. Las fuolhas tráien–mos un festibal de quelores i, al modo que ban caiendo, i déixan las arbles znudas, pus nun cunsíguen aguantar ua folhaige a que l aire le çfróncia a cada die l pencino; a cada die las bareia cumo azeitunas i a cada die baria l sentido de adonde assopra; i assi se zgrácian aqueilhas quelores, neste tiempo an que l aire nun apláquia.

18 de Novembre de 2007

Amadeu Ferreira