amadeu · 11/10/2006

Ls mius parabienes a todos ls que tubírun la coraige de respunder a este purmeiro eisercício de scrita, sien miedo de dar erros. Uns stubírun bien outros menos bien, mas quien nun respundiu fui quien dou mais erros yá que ls deixou a todos sien eimenda.

Bendo bien, estes eisercícios son a modo de ditados al alrobés, an que ye l porsor que dá erros i ls alunos puoden screbir bien. Por esso, nun hai que tener miedo, que doutro modo ye mais defícele daprender. Stou cierto que l númaro de pessonas cun coraige para respunder eirá crecendo als poucos, al modo que fúren deixando de quedar grimadas por se stendéren publicamente.

Para cada un poder eimendar la sue repuosta, eiqui queda la scrita de ls testos an mirandés, cumo debe de ser, antes de passarmos a cousas nuobas. Ls erros stan marcados a negro:

1 - Ls rapazes nomeában un xefe de la mocidade, que era siempre um rapaç.

2 - Datrás muita giente andaba sien çapatos i hai quien diga que era feliç.

3 - Hai quien baia a Çamora al doutor i a mercar cousas, mas berças ye cousa que las pessonas cuolhen na huorta.

4 - Muitos que nun son crestianos ándan de curcefício al peito.

5 - La lhana de las oubeilhas serbie para fazer camisolas.

6 – Cun buona lhuna bei-se muita cousa, mas nun hai cumo la lhuç de l sol.

Bamos a fazer muitos destes eisercícios i bereis, al acumparar, deiqui a algun tiempo, que las repuostas ban melhorando. Deiqui palantre bamos-le a chamar DITADO AL ALROBÉS. Tamien fui a ler i a fazer ditados que you daprendi a screbir l pertués, na scuola. L mirandés nun tube essa suorte.

Qualquiera die bamos a dar mais un brinco i passamos a la fala. Alhá chegaremos.

11 de Outubre de 2006

Amadeu Ferreira