001. Apersentaçon de las classes de fala

http://www.youtube.com/v/Ps6iWElY1WI

(testo lido por Amadeu Ferreira, Bina Cangueiro i Francisco Domingues)

Acá stamos, anton, para ampeçar las classes de fala de l Curso de lhéngua mirandesa de l Sendin an Linha – SAL.

La boç que stais a oubir ye de Amadeu Ferreira , l porsor deste curso. Sou sendinés i, por esso, la mie fala ye a la moda de la bariadade sendinesa de l mirandés.

Cumigo tengo outros dous mirandeses, que me ban a dar ua upa mui fuorte nestas classes: Bina Cangueiro i Francisco Domingues.

Dambos a dous son porsores de mirandés ne l cursos dados pula Associaçon de Lhéngua Mirandesa, an Lisboua.

Bina Cangueiro ye de Augas Bibas i la sue pernúncia ye la de l mirandés central.

Bienbenida, Bina, al nuosso curso.

Oulá, Amadeu.

Ye un gusto star eiqui cun cuntigo i cun Francisco para falar la nuossa lhéngua.

Cumo bos dixe, tamien stará eiqui Francisco Domingues. El ye de Zenízio i la sue pernúncia ye la de l mirandés central, inda que a las bezes, mas mui ralamente, apersente algues specialidades.

Bienbenido Fracisco

Oulá, Amadeu. Oulá, Bina.

Quien dirie que un die íbamos a star a dar scuola pula anternete? La bida, i tamien la bida de las lhénguas, dá muita buolta.

Acerta.

Feitas las apersentaçones, bamos hoije a amostra-bos ls sonidos que ténen las letras de l abc, an mirandés. Para esso bamos a dezir bárias palabras an que aparécen ls defrentes sonidos de cada letra. Para melhor acumpanhardes la nuossa fala, cada letra an que l sonido se quier çtacar, aparece carregada a negro. Assi cada pessona puode acumpanhar ls sonidos al mesmo tiempo que lei l testo.

Bamos anton alhá a la purmeira liçon.

Tenemos cuncéncia de que stamos a ampeçar un camino nuobo i, tamien al caminar, eiremos daprendendo a fazer melhor.

22 de Outubre de 2006

Amadeu Ferreira