002 - Reber, lhembrar i (re)ampeçar

editada dia 17-09-2007 8:39:58 por: 2giga

002 – Reber, lhembrar i (re)ampeçar

1. Ye natural que un curso de lhéngua i cultura ampece por chamar l’atençon pa la necidade de reber i lhembrar las matérias que fúrun dadas an anhos atrasados. Cun nós nun ye defrente.

Torna-se specialmente amportante lhembrar, mesmo nas cousas mais menudas, las liciones que respéitan:

- a la Cumbençon Ourtográfica de la Lhéngua Mirandesa, a sue 1ª Adenda i a la perpuosta de sue 2ª Adenda ;

- a la gramática de la lhéngua mirandesa .

A este trabalho bamos a dedicar algun tiempo, para apuis nun mos perdermos nas matérias que bénen a seguir . Bamos, anton, a falar un cachico dessas rebisones i a marcar algun trabalho pa las fazermos.

2. La Cumbençon Ourtográfica de la Lhéngua Mirrandesa i sue Adenda , fui stando persente al lhargo de todas las liciones que demos ne l 1º anho . Ua i outra se puoden achar , i cumben tené-las persentes, an http://mirandes.no.sapo.pt/LMRNconvencao.pdf

Inda que , por defeniçon, ua cumbençon nun seia oubrigatória, este curso [i todo l ansino que até agora ten sido feito de l mirandés] sigue cun rigor la Cumbençon Ourtográfica, cun las altaraçones feitas pula sue 1ª Adenda . I assi cuntinará a ser anquanto nun seia altarada, se un die l benir a ser : até alhá todo puode ser çcutido, mas l seguir la Cumbençon Outográfica ye un percípio eissencial de ounidade anterna de l mirandés i de la sue credeblidade interna i sterna . Dito por outras palabras: se la Cumbençon nun fur seguida , esso quier dezir que nun mos lhebamos a nós mesmos , mirandeses, a sério i que las pessonas de fuora, ancluindo ls strangeiros que mos stúdan, nun mos lhieban a sério .

Assi sendo, nun se puode cunfundir la çcuçon salutar i neçaira de las seluçones cunsagradas [i debe de quedar bien çclarado quando se adota essa postura , que ye de respeitar , yá que l studo ye eissencial, cun ua frase de l stilo: «soluçon adotada solo para eifeitos de studo»] cun l poner de lhado, inda que solo an algues partes , de la Cumbençon i de sue 1ª Adenda , la única que até agora fui aprobada. A naide le passa pula cabeça screbir l pertués ou outra lhéngua cumo le dir la gana , mas scribe-la siempre cunsante ye la sue scrita oufecial. Porque ha de ser defrente cul mirandés? La Cumbençon Ourtográfica de la Lhéngua Mirandesa bai yá an uito anhos de aplicaçon i ten-se benido a cunsolidar la scrita cun assento ne l modo que eilha cunsagrou: essa ye la scrita de l mirandés moderno i nun hai outra , i quienquiera que faga doutro modo , por muito respeito que mos mereça, nun puode ser lhebado a sério nessa parte .

Ne l 1º anho deste nuosso curso fui dada ua grande amportança a la apersentaçon de las bariadades de l mirandés i a la defénsia de la sue ounidade cumo lhéngua. Todo puode ser lido subretodo na licion 006 – Bariadade i ounidade de la lhéngua mirandesa. Ende se defende que las defrentes bariadades de l mirandés fórman ua sola lhéngua, i son apersentados un cunjunto de percípios por que ten de se guiar la defénsia de l’ounidade i de la bariadade de l mirandés.

Tratemos de l mirandés cumo lhéngua na licion 009, i cumben relhembrar tamien l que ende screbimos.

La 1ª Adenda , aprobada an 2000, stá bien justeficada na licion 007, subre ls ditongos crecientes, matéria a que se dou grande amportança i zambolbimiento. Hai que tornar a ler essa licion cun muito atento para relhembrar todo , ancluindo l fundamiento i la justeficaçon dessa Adenda .

Quanto a la 2ª Adenda , ye solo ua perpuosta que nunca chegou a ser aprobada. Eilha ten solo a ber culs balores i scrita de l «x» an mirandés i fui apersentada de modo cumpleto i zambolbido na licion 004 – La scrita i l balor de x an mirandés. Fui ua scuolha deste curso aplicar antegralmente l cuntenido de la 2ª Adenda , cumo se eilha yá houbira sido aprobada.

Stá bien de ber que la Cumbençon Ourtográfica i sues Adendas nun trátan de todos ls casos de scrita de l mirandés, yá que solo un pruntuairo ourtográfico l poderie fazer . L nuosso curso nun arreculou delantre dessa deficuldade i fui apuntado caminos possibles para muitos casos de scrita, tamien assentando ne l que ten sido la prática de ls porsores de mirandés i de ls percipales scritores de lhéngua mirandesa.

3. Cumben rebesitar l abc mirandés [ ber la licion de gramática 002 ]   i sues caratelísticas i acumpanhar essa besita oubindo las liciones de fala que tátan de ls sonido de cada letra , que son las liciones de fala 002, 003, 004, i 005 .

Para quien ben pula purmeira beç al mirandés, l cunseilho que le puodo dar ye que óuban l mais bezes que podíren las liciones de fala que stan publicadas i adonde se trata de ls sonidos i de l bocabulairo mais simples .

4. L que queda dezido ye l eissencial que hai que saber para ampeçar este  2º anho . Apuis desso tenemos bárias liciones de gramática, que cumben rebesitar i lhembrar, subre: l artigo , l sustantibo, l adjetibo, ls pornomes pessonales i possessibos, i la cunjugaçon de ls berbos an – ar , -er, -ir i de ls percipales berbos ousseliares.

Bamos agora a cuntinar cul studo de ls pornomes (demustratibos, andefenidos, anterrogatibos, relatibos), mas tamien de las perposiçones, de las cunjunçones i de ls adbérbios. Cumo tenemos tratado nun solo de questiones de morfologie, mas tamien de sintaxe , assi cuntinaremos.

Yá ne l que toca als berbos, demos las bases para poder ir mais loinge ne l studo de ls berbos eirrigulares, an special de ls berbos an –iar i an –ear, de ls tiempos cumpuostos i de la boç passiba. Para abançar para ende hai que tener sigurança quando a las cunjugaçones de base . Ye berdade que bamos a publicar al lhargo de l anho un dicionairo de berbos, mas esso nun sustitui l coincer las regras básicas de la formaçon de ls tiempos an mirandés.

Possiblemente yá nun teneremos tiempo de tratar toda la sintaxe [de ls berbos i outras particularidades cun eilhes relacionados, ou la sintaxe de las perposiçones, adbérbios i cunjunçones] mas muita cousa tenerá que quedar para un possible 3º anho , caso haba giente antressada an cuntinar a aperfundar l studo de la lhéngua mirandesa.

5. Quanto a eisercícios de rebison, eilhes ban a ser marcados yá a seguir , mas eiqui se deixa yá algun trabalho para fazer .

Las pessonas que éntran astanho pula purmeira beç , cumben que ampécen a tratar de la scrita mais simples . Para esso l que le aperpongo ye que resuolban ls eisercícios que son apersentados ne l curso de l 1º anho cumo nuobos eisercícios . Ban resolbendo un de cada beç i yá que nun teneran sítio de l curso pa ls apersentar dében ambiá-los para cursomirandes@gmail.com i lhougo le mandarei la correçon i darei las andicaçones que ende se justeficáren.

Este queda cumo trabalho a ser feito puls alunos que astanho se anscrebírun pula purmeira beç. Yá eirei a poner esse eisercício ne l sítio próprio marcando ls prázios a respeitar .

Las pessonas que yá fazírun l purmeiro anho tamien ban a fazer eisercícios de rebison, para ber l stado an que se ancóntran. Esso tamien ajuda a defenir l ritmo de l nuosso curso . Yá deiqui a pouco starei a poner esses eisercícios ne l sítio cierto.

Bamos  a  passar cun trabalho i preguntas de rebison até la fin de Setembre , i nun ye muito . Mas cada ua/un ten de s’ aplicar para abançarmos para cousas nuobas.

6. Por hoije solo quiero deixar mais ua eideia: la lhéngua mirandesa ye mui paciente , que tubo de asperar seclos para ser studada, respeitada i recoincida; ne l nuosso curso bamos a ir debagarico, respeitando l saber i ritmo de cada ua/un, sien priessa, que todos son amportantes pa la lhéngua mirandesa. L tenermos publicado esta licion lhougo ne l die apuis de la 1ª, esso nun quier dezir que bai a ser siempre assi. Stá bien de ber que, al ampeçarmos a andar, hai que ganhar baláncio i purparar la carreira para que siga dreita pul camino alantre.

Ye un gusto recebir ne l nuosso curso pessonas que nun son mirandesas, que benírun até nós pul coraçon ou por outras rezones, que todas son bálidas. Se podíren traier outras pessonas al nuosso curso , nós agradecemos i eilhas seran bien benidas.

Cumo qualquiera lhéngua, l mirandés puode ser ansinado i daprendido: esse ye un modo de acraditar, al mesmo tiempo, na lhéngua i nas pessonas. Ye assi que tamien se defende este património eimaterial de la houmanidade.

16 de Setembre de 2007

Amadeu Ferreira