006 – Las buonas horas
2giga · 24 de deziembre de 2006 · Curso de lhéngua mirandesa (1º Anho)
006 – Las buonas horas
A - Buonos dies Bina, que andas a fazer porqui?
B - Buonos dies, Amadeu. Sabes, you inda gusto de dar las buonas horas cumo quando era nina.
A - Por esso que nun seia. Antoce, Dius mos dé buonos dies, Bina.
B - Buonos dies mos dé Dius, Amadeu. Çculpa, mas nun sei se yá biste que passa de meidie.
A - Tenes rezon. Yá son horas de dezir buonas tardes mos dé Dius.
B – Tu, quando quieres, si dizes las cousas al modo. Que andas a fazer porqui? Yá dies há que nun te bie?
A - Nien you a ti. Yá almorceste?
B - Yá comi un muordo, mas la gana ye pouca.
A - Anda dende que te pago un café. Anton, que amboras me cuntas?
B - Mira quien stá eilhi a tomar café! Buonas tardes Fracisco, que andas a fazer tan loinje de casa?
F – Buonas tardes Bina i Amadeu. An que modo?
A – Buonas tardes. Que se passa, home?!
F – Puso-se-me un delor eiqui nas costielhas i bin a tirar ua xapa. Apuis, fizo-se tarde i antrei ne l café a anganhar la fame. Anton i bós?
A – Nós zbarremos-mos eilhi na rue, sien querer.
B – Stábamos a falar de dar las buonas horas al modo datrás.
F – Ó, isso yá se bai perdendo. Se bien calha yá hai giente que passa i nun diç nada. Mas bou-bos a deixar que tengo priessa i se nun me bou ponemos-mos nuas i noutras i deiqui a cacho yá tengo de bos dezir, Dius bos dé buonas nuites.
A - Por nós nun t’atrases. Buonas tardes Fracisco.
B – Bai-te alhá i dá-le bejitas a la tue tie.
F – Anton, anté qualqueira die, que téngamos mais bagar.
A – Adius Fracisco i trata-me desse delor.
10 de Dezembre de 2006
Amadeu Ferreira
