012 – Que horas son
2giga · 5 de febreiro de 2007 · Curso de lhéngua mirandesa (1º Anho)
Ne ls dies de hoije, hai quien diga que l tiempo mos goberna, siempre afergulhados a mirar pa las horas que son, a ber se nun chegamos atrasados ou se yá son horas ou se yá passa de la hora.
Assi i todo, sabemos bien que la culpa nun ye de las horas, mas de la cebelizaçon que fumus custruindo. Anton, hai que saber cumo se dízen las horas an mirandés.
Se mos pregúntan: que horas son?, ou anton, que horas tenes?,
podemos respunder: ye meidie, ou anton, ban a ser las quatro, ou inda, yá passa de las trés.
Mas podemos dar ua hora inda mais cierta: son las dieç menos siete minutos, ou anton, fáltan siete minutos pa las dieç; son las quatro i un quarto; son las dues i meia.
Mas se fur meidie i meia hora solo dezimos: ye la meia.
I ye siempre assi, cunsante las horas que l reloijo dá, que agora yá quaije naide mira pa l sol a ber que horas son, cumo se fazie datrás, inda nun hai muito tiempo.
Bamos anton a dezir todas las horas de l die:
meia nuite
l’ua de la manhana
las dues de la manhana
las trés de la manhana
las quatro de la manhana
las cinco de manhana
las seis de la manhana
las siete de la manhana
las uito (de la manhana)
las nuobe (de la manhana)
las dieç (de la manhana)
las onze (de la manhana)
meidie
la ua (de la tarde)
las dues (de la tarde)
las trés (de la tarde)
las quatro (de la tarde)
las cinco (de la tarde)
las seis (de la tarde)
las siete (de la tarde)
las uito (de la nuite)
las nuobe (de la nuite)
las dieç (de la nuite)
las onze (de la nuite)
Solo tenemos que dezir que las horas son de la manhana, de la tarde ou de la nuite quando esso ye perciso para antender bien an que parte de l die stamos. Afuora esso, bonda dezir las horas. Assi i todo, tamien sabemos que la nuite ampeça mais cedo ne l eimbierno do que no berano. Usa-se poner l artigo antes de las horas (menos a meidie i a meia nuite), mas tamien puode nun se poner.
Ye cumo ye a essa hora que stou a grabar, buonas nuites para todos i para todas.
5 de Febreiro de 2007
Amadeu Ferreira
