013 – L’anternete i l mirandés dan-se bien
2giga · 16 de febreiro de 2007 · Curso de lhéngua mirandesa (1º Anho)
013 – L’anternete i l mirandés dan-se bien
A - A las bezes, cuidamos que las cousas antigas nun se dan culas cousas nuobas, mas nun ye berdade. Cumo tal, la lhéngua mirandesa, yá ye mui antiga i dá-se mui bien cula anternete, que ye ua de las marabilhas de ls nuossos dies. Ye cula anternete que l mirandés bai chegando a las quatro squinas de l mundo. Se nun fura l’anternete nun poderiemos star a dar eiqui este curso nien a falar uns culs outros cumo se stubíramos acerca.
F - Se birmos bien, las lhénguas puoden ser antigas, mas stan-se siempre a renobar, por isso son siempre nuobas.
B – You yá nien scribo an papeles i quando quiero saber algua cousa nistante mando ua carta eiletrónica, todos dízen e-mail i you tamien digo. Ye assi que se diç ne l mais de las lhénguas i nun beio porque nun se há-de dezir tamien an mirandés.
A – Puode ser que un die áchemos ua palabra nuoba al modo.
F – Por eisemplo, you a las teclas de l cumputador chamo-le ls botones i l teclado ye la botoneira.
B – I stá bien. Até ye aparecido culs botones dun harmónico que antigamente s’ousaba para tocar i beilar.
A – Hai muita cousa nuoba que la lhéngua mirandesa nun ten nome para eilhas, mas esso bai-se dando als poucos.
F – Mas tornando a l’anternete, ye rialmente ua marabilha. Todo puode quedar acerca de to la giente. L mirandés yá ten muita cousa n’anternete, mas inda habie de tener mais. Acho que ye ua cousa an que tenemos que ambestir mais para dibulgar la nuossa lhéngua i la nuossa cultura.
B – I ye mui amportante pa la giente nuoba, que anda siempre a çarandar pula anternete a saber de cousas nuobas. Inda po riba ye quaije de grácia.
A – Ye berdade. La mocidade nun puode quedar cula eideia de que l mirandés ye solo ua cousa de bielhos ou ua cousa de l passado. Ye subretodo ua cousa de l feturo. I l’anternete puode ajudar muito a traier esse feturo.
F – Ua buona maneira de daprender ye ua pessona passar a mandar solo las mensaiges an mirandés. Al percípio puode custar, mas apuis bai-se afazendo i screbindo cada beç melhor, quaije sien dar por eilha.
B – Ye isso mesmo que you fago hai muito tiempo.
A – Anton deixa a ber se hai cada beç mais giente que faga cumo tu. Esse ye un bun eisemplo.
16 de Dezembre de 2006
Amadeu Ferreira
