07 – Eisercício (7) – Plural i singular (resoluçon)

07 – Eisercício (7) – Plural i singular (resoluçon)

Bei-se, a cada eisercício que fazemos, que las cousas ban andando al palantre. Mui ralas pessonas dórun erros neste eisercício. I ye mui buono tener giente nuoba ne l nuosso curso.

Eiqui quédan las repuostas ciertas al eisercício, para cada un acumparar cula sue repuosta. Muitos parabienes a todos i, mais ua beç, bun anho de 2007 i Dius bos l pague pul botos que me mandestes. Este bai a ser un anho mui amportante pa l nuosso curso, pus inda tenemos muito, muito camino que andar. Mas bamos debagarico, para nun mos cansarmos, sien nunca parar i hemos de chegar adonde queremos.

1 - Todos ls juizes ténen de ser andependientes, senó nun se faç justícia cumo debe de ser. A las bezes ye cumo andar a saber deilha cun candiles.

2 - Ls palumbares lhougo quédan chenos de palombas se tubíren muito cebo.

3 - Las nueiras astanho dórun muitas nuozes, mas yá passórun ls meses de las apanhar. Podemos comé-las l dies de Reis.

4 - Ls gabilanes bólan culas alas abiertas.

5 - Las ties yá nun ándan culs filhos als chinchins.

6 - No Antruido ls rapazes botában muitos rascapezes.

Ana Maria Fernandes pregunta l que son rascapezes. Un rascapeç ye l que an pertués se chama «bicha-de-rabear», que l dicionário define assi: «peça de fogo-de-artifício que executa muitas voltas caprichosas». No Antruido, quando you era garotico, botában-se muito esses rascapezes, que nun stourában, solo botában muita chiçpa, fungában i dában muita buolta. Nun sei nien nunca fui a saber de la rezon porque le dan esse nome. Se alguien tubir ua eideia, que diga.

António Mendes diç que nun atende nada i percisa de ajuda. Para yá, puode cuntar cula oufierta de ajuda que le fizo Gabilan. Mas stamos todos prontos pa l ajudar, se mos dezir de que ajudas percisa.

07 de Janeiro de 2007

Amadeu Ferreira