Eisercício (5) – Mensaiges de l Natal i Anho Nuobo
amadeu · 4 de deziembre de 2006 · Curso de lhéngua mirandesa (1º Anho)
Eisercício (5) – Mensaiges de l Natal i Anho Nuobo
Hoije aperpongo-bos un eisercício defrente de ls atrasados, un eisercício que nun ye ditado al alrobés. Cumo stá ende acerca l Natal i l nuobo anho nun tarda, muita giente gusta de mandar mensaiges de buonas fiestas por esta quadra. Nun sei se bós gustais ou nó de mandar essas mensaiges, mas esso agora nun antressa. L que bos aperpongo ye l seguinte:
- cada ua / un bai a screbir ua mensaige de Natal i de Anho Nuobo, an mirandés, nua sola mensaige ou an dues mensaiges apartadas para cada un desses dies. Podeis ousar la buossa eimaginaçon, cumo quejirdes, a ber se sal ua cousa apilarada.
Apuis bamos a corregir cada ua de las mensaiges i quedamos eiqui cun bárias dessas mensaiges an mirandés. Assi yá podeis ambiar las buonas fiestas an mirandés als buossos amigos i a quien bós quejirdes, sien que téngan que bos apuntar erros.
Para ajudas deixo algues palabras que podereis querer ousar. Se percisardes doutras que nun sábades, nun deixeis de preguntar.
Anho Bielho
Anho Nuobo ou Anho Buono
Buono / bun
Cousas buonas
Desear (deseio-bos, deseio-te, deseio-le)
Feliç / felcidade
Fiestas
Natal
Cunselada / cunsoada
04 de Dezembre de 2006
Amadeu Ferreira
