Eisercício-lhembrar 007. Traduçon II - Resoluçon

Eisercício-lhembrar 007. Traduçon II - Resoluçon

Eiqui queda la mie traduçon, cun dous dies de atraso. Las repuostas stan bien, pena que mais giente nun houbira respundido. Eiqui queda un testico que puode ser ousado nas scuolas puls mais pequerricos.

La formiga i la niebe

Ua formiga prendiu l pie na niebe.

“Á niebe, tu sós tan fuorte que l miu pie prendes!”

Responde la niebe:   “Tan fuorte sou you que l Sol me derrite.”

“Á Sol, tu sós tan fuorte que derrites la niebe que l miu pie prende!”
Responde l Sol: “Tan fuorte sou you que la parede m’ampide!”

“Á parede, tu sós tan fuorte que ampides l Sol, que derrite la niebe, que l miu pie prende!”
Responde la parede: “Tan fuorte sou you que l rato me fura.”

“Á rato, tu sós tan fuorte que furas la parede que ampide l Sol, que derrite la niebe, que l miu pie prende!”

Responde l rato: “ Tan fuorte sou you que l gato me come.”

“ Á gato, tu sós tan fuorte que comes l rato que fura la parede, que ampide l Sol, que derrite la niebe que l miu pie prende!”

Responde l gato: “Tan fuorte sou you que l perro me muorde.”

“Á perro, tu sós tan fuorte que muordes l gato, que come l rato, que fura la parede, que ampide l Sol, que derrite la niebe que l miu pie prende!”

Responde l perro: “Tan fuorte sou you que l palo me dá.”

“Á palo, tu sós tan fuorte que dás ne l perro, que muorde l gato, que come l rato, que fura la parede, que ampide l Sol, que derrite la niebe que l miu pie prende!”

Responde l palo: “Tan fuorte sou you que l lhume me queima.”

“Á lhume, tu sós tan fuorte que queimas l palo, que dá ne l perro, que muorde l gato, que come l rato, que fura la parede, que ampide l Sol, que derrite la niebe que l miu pie prende!”

Responde l lhume:”Tan fuorte sou you que l’auga me apaga.”

“Á auga, tu sós tan fuorte que apagas l lhume, que queima l palo, que dá ne l perro, que muorde l gato, que come l rato, que fura la parede, que ampide l Sol, que derrite la niebe que l miu pie prende!”

Responde l’auga: “Tan fuorte sou you que l bui me bebe.”

“Á bui, tu sós tan fuorte que bebes l’auga, que apaga l lhume, que queima l palo, que dá ne l perro, que muorde l gato, que come l rato, que fura la parede, que ampide l Sol, que derrite la niebe que l miu pie prende!”

Responde l bui: “Tan fuorte sou you que l açougueiro me mata.”

“Á açougueiro, tu sós tan fuorte que matas l bui, que bebe l’auga, que apaga l lhume, que queima l palo, que dá ne l perro, que muorde l gato, que come l rato, que fura la parede, que ampide l Sol, que derrite la niebe que l miu pie prende!”

in Adolfo Coelho, Contos Populares Portugueses.

Notas:

- Ah > you questumo screbir Á! [yá que an mirandés, al alrobés de l pertués, esta palabra nun se cunfunde cun nanhue outra, i ye mais simples], mas nun beio que nun se puoda ousar tamien Ah!

- impedir > cuido que ousamos ampedir an mirandés cul mesmo sentido de an pertués.

- bater > cuido que l mais ousado an mirandés ye dar i dende la scuolha.

- carniceiro > açougueiro (l tiu de l açougue)

22 de Novembro de 2007

Amadeu Ferreira