(movido) ZAFIO AL ZAMBOLBIMIENTO DE L MIRANDÊS

Leonardo Antao · 23 de outubre de 2007 · CURSO DE MIRANDÉS de l SAL – 2º ANHO

Quando li l último artigo de Amadeu Ferreira nel jornal Nordeste de 16.OUT.07, "Poucas bergonhas que la léngua mirandesa ten aguantado" screbi eiqui uas sugestones relacionadas cun este assunto de "zafiar l zambolbimiento de l Mirandês", que me desapareciran, i tento agora relhambrar.
Neste artigo de Amadeu, estan alguas medidas fuortes que, se fussan puostas an prática, la lhéngua mantenesse biba, tals cuomo, "alhargar l ansino de l mirandês, anraizá-lo nas anstituiçones tales cuomo nas Cámaras i nas Juntas de Freguesie, assi cuomo criar un ourganismo que organize i centralize todo l ten benido a ser feito pul mirandés".
Nasci i cresci an Zenízio, nua família de siete armanos, cun Mai analfabeta, onde bigoraba l miedo de falar l mirandés an público. Percebi, mais tarde que este comportamiento era ua represson als balores-chabe de la cultura i de la stória de la nuossa aldé i de la eidentidade de mirandeses/zenízienses genuínos. Por isso, lhougo que puode, i tenendo an bista houmenagear mie Mai i outros analfabetos cuomo eilha, lhuitei para mantener, zambolber l ansino de l mirandês. Graças al grande apoio de Amadeu Ferreira, las nuossas Associaçones Nial de la Boubilha i la de Lhéngua Mirandesa, yá ministroran 6 ou siete anhos de Cursos de Lhéngua Mirandesa an Lisboua i an Corroios. Hoije siento que hai que acresçantar muito mais, que "l ansino de l mirandés ten que ir mais, muito mais loinge" cuomo screbiu Amadeu Ferreira.
Yé preciso ançantibar i apoiar las pessonas que biban nas aldés onde inda se fala l mirandés, de ls concelhos de Miranda, Vimioso i Mogadouro a apranderan a screbé-la i a teneran guosto an cuntinuar a falá-la. Esta formaçon yé andespensable para acresçantar i anriquecer la democracie, culs balores de la tolerância i de l respeito por un balor-chabe, histórico de lhiberdade de lhéngua que ben sendo falada hai mais de 2000 anhos i que ben fazendo felizes alguns milhares de pessonas que biban nas aldés daqueilhes trés conceilhos. Tenemos de lhuitar contra l miedo de cuntinuar a falar mirandés, de sermos considerados analfabetos i incultos, porque isso yé auto-amordaçarmos na parte mais genuína de la nuossa alma.
Para isso propongo juntarme-nos, todos ls que nun queremos deixar morrir la nuossa lhéngua, ua beç por més, nun local i horas a combinar, onde só falemos la nuossa querida lhéngua mirandesa i onde possamos "zafiar l zambolbimiento de l mirandés" i de sermos um farol de estímulo ls nuossos cunterrãneos que biban nas aldés, para l progresso de las nuossas tierras mirandesas i de demonstrar a las anstituiçones democraticas que l mirandés yé amportante.
Tenemos tambien de pansar nun ourganismo que seia gerador de fundos para apoiar l lhançamento de lhibros an Lhéngua mirandesa, de alguns recentes scritores (cuomo Faustino Antão, Valter Deusdado i outros que leio no blogue Froles Mirandesas i no jornal Nordeste), que yá proboran cua grande dibersidade de artigos que screbiran, que tenan grande coincimento de la cultura mirandesa i de ls balores humanos i stóricos de ls mirandeses. Amigos mirandeses, parece-me que nunca oube clima tan propício cuomo agora, para fazer cousas a fabor de l mirandés, i para nun l deixar morrir. Bamos palantre! L camino stá an conbersarmos mais, an ancuontrarmos mais, an mos ourganizarmos mais i ourdenarmos melhor las nuossas eideias.
Termino cul dezideiro " nunca fará nada quien todo l deixa para manhana" Leonardo Antão
23 OUT 07.

249 besitas ne l sítio de anton

6 repuostas

Leonardo Antao outor 2 de nobembre de 2007

HABERÁ QUIEN QUEIRA L ZAMBOLBIMIENTO L MIRANDÊS?
Naide ten oipenion suobre l zambolbimiento de la lhéngua mirandesa?
Será que nós ls mirandeses yá antandimos que lhéngua mirandesa de base oural ten benido a perder fuorça?
Yé ou nó berdade que cada beç hai menos personas a fala-la nas aldés, porque las tierras de Miranda tenan sofrido un grande eizolamiento i ua grande desertificaçon?
Será que nós ls mirandeses yá antandimos que para l zambolbimiento de la lhéngua mirandesa yé mui amportante screbir todo l que até nós chegou por bias de l’ouralidade?
Será que nós ls mirandeses yá antandimos que para l zambolbimiento de la lhéngua mirandesa tenemos de apoiar las personas falantes actualmente existentes nas aldés, i tambien desambulber nuobas quemunidades falantes an zuonas de Pertual onde biban mirandeses?
Este parece-me un grande zafio que tenemos pal feturo de la lhéngua mirandesa.
Cul coraçon a sangrar, sinto que pouco estamos a fazer para ampedir que se perda tanta cultura i lhiteratura oural mirandesa, que se bai morrindo cun la muerte de las personas de mais eidade falantes de l mirandés mais genuíno. Só deseijo que estas pequeinhas anterrugaçones sirban para ounir ls que screban neste blogue a unir-se na mesma lhuita de dibulgaçon de la nuossa cultura i de la lhéngua mirandesa i ampedir que la ditadura de la globalizaçon cuntinue a ctruir la nuossa grande eidentidade cultural.
Leonardo Antão
2 NOV 07.

Leonardo Antao outor 2 de nobembre de 2007

Ana Maria F 2 de nobembre de 2007

Sr Leonardo,

Inda nun habie anterbenido por falta de tiempo (al cuntrairo de l anho passado an que tenie mais desponibilidade para screbir neste SAL)…
Mas acho que tamien ye l miu deber cumo sendinesa de deixar aqui l miu testemunho... Modesto testemunho porque afinal, pul menos geograficamente falando, nien sequiera pertenço a ningua dessas quemunidades de falantes ouriundas de las Tierras de Miranda radicadas an Pertual...
Mas nun ye esso que me ampide de refletir, de me posicionar i tamien de reagir. Yá un die cheguei a dezir neste site que para mos calharmos bien calhadicos bastará l die an que yá nun seremos deste mundo, todos sien eiceçon, séiamos ricos ou probes, todos, uns atrás de ls outros...
Mas até alhá, inda stamos bibos i depuis de nós beneran ls nuossos filhos. I ye aqui que stá la nuossa respunsabilidade: que queremos tamien para eilhes ?
A mi, todo l que toca a la eidentidade cultural que passa tamien pula lhéngua ou até pulas lhénguas que falamos i daprendemos a falar durante toda la bida (normalmente cada beç mais lharga graças als progressos de la ciéncia) ye na mie opinion de la purmeira amportáncia.
Mais: defender, balorizar, ansinar, daprender, praticar, falar, screbir la nuossa lhéngua de siempre, l Mirandés, puode ser un eilemento eissencial de redinamizaçon cultural i até eiconómica de las Tierras de Miranda...
L que querie dezir inda anque yá nun tenga muito tiempo hoije (Mas tornarei lhougo que pudir) ye que todo isto mos obriga a tomar alguas decisones. Decisones talbeç muito mais amportantes que aqueilho que pensamos.
Spero sinceramente que outros se manifésten. Ye neçairo. Porque ye cul diálogo (mesmo que por bezes mos pareça defícele ou até einútele) que poderemos abançar i ancuntrar soluçones. La muorte ye precisamente quando deixa de haber diálogo.
Por esso, ls mius parabienes, Sr Leonardo, por mos lhembrar que la lhéngua inda bibe... L que speramos ye que mos aqueça durante inda muito tiempo porque sabemos que tamien ye capaç de mos tornar felizes... L Ambierno solo stá a ampeçar!

Leonardo Antao outor 15 de nobembre de 2007

Amable Amiga Ana Maria:
Agradeço, cun muita satisfaçon, l tou amable testemunho que demostra teneres un buono antendimento de la lhéngua mirandesa. Custa-me a acreditar que nun la daprandiste de pequeinha, cuomo you, i que “nien sequiera pertenças a la ningua dessas quemunidades de falantes ouriundas de las Tierras de Miranda radicadas an Pertual...” Yé mui anteressante falares nos nuossos filhos “que queremos tamien para eilhes ?“ Cuoncordo cuontigo que “todo l que toca a la eidentidade cultural passa pulas lhénguas que daprendemos a falar durante toda la bida”.
Ye mie opinion, que la de purmeira amportáncia yé la que daprandemos a falar no canastrico, la que mos ansinoran nuossos pais i abós, i se la abandonarmos quedaremos sien alma, sien cultura, sien boç, ... sien un patrimonho cun mais de nuobe seclos de eijisténcia. Por esso de de purmeira amportância, dizes tu mui bien: “defender, balorizar, ansinar, daprender, praticar, falar, screbir la nuossa lhéngua de siempre, l Mirandés”.
Yé ancantador este tou cachico de testo “puode ser un eilemento eissencial de redinamizaçon cultural i até eiconómica de las Tierras de Miranda...” Assi sendo ajudeste-me muito a recuompuner la mie proua de ser mirandés, porque grácias al grande apoio de Amadeu Ferreira i Francisco Domingues, yá cierca de siete anhos que andamos a defendé-la, a balorizá-la, a daprendé-la, a praticá-la, a falá-la, a screbí-la, nun cuorso i palestas que ban cuontinuar este anho an Corroios.
Amiga Ana Maria, spero que cuntinues l trabalho aporfundamiento de la cultura i lhéngua mirandesa i a ampedir que se perda tanto tesouro que las pessonas de las eizoladas aldés mirandesas mos transmitiran anté hoije i, muito amportante, que cuntinues a cuontribuir para que la lhéngua mirandesa puoda bibir por muitos i muitos anhos.
Leonardo Antão
15 NOV 07.

Leonardo Antao outor 26 de nobembre de 2007

Amiga Ana Maria:
Ampeço por te pedir por me tratares por “tu”, que çpenço ls títulos académicos i militares i l eicelentíssemo, i, que me çculpes la lhiberdade que you tomei, sien te coincer, te ampeçar a tratar pou tu. La justeficaçon está an que ls testos que li screbidos por ti me demonstroran que tenes un grande pula lhéngua mirandesa i puls mirandeses. Cuomo you sou mirandés, de Zenízio, i tamien tengo un grande lhéngua mirandesa, considerei-te armana de la mie grande família mirandesa i mie grande amiga, mesmo sien nunca te ber i oubir.
Relatibamente l tou testo, acho amportantíssima la tu sugeston de houmenagear, pal l anho que ben, an Julho eisatamente, José Leite de Vasconcelos, que bai a fazer 150 anhos que naciu i fui un de ls purmeiros mais grandes ambestigadores de la Lhéngua Mirandesa.
Cunbersemos, no passado Sabado 24NOV, alguns zenízienses de ls Organs Sociales de la Associaçon Nial de la Boubielha, i decidimos manifestar l Presidente de la Direcçon de la Associaçon de Lhéngua Mirandesa, que yé Amadeu Ferreira, l nuosso apoio para tantar lhebar a efeito la tue eicelente propuosta, dentro de las nuossas mui lhimitadas cuondiçones financeiras.
Berifiquemos la nuossa ancapacidade para lhebar palantre la tue ambiciosa i mui detalhada propuosta, mas tamien berifiquemos la sue amportáncia, para la promoçon de l mirandés, i para, andirectamente, houmenagear aqueilhes que mais cuontribuiran para dignificar ls analfabetos ou quaije analfabetos, çcoincidos de las tierras de Miranda que aguantaron ua lhéngua cun mais de dous mil anhos de stória de Pertual, sin la screbir, tu bien sabes, apenas cun palabras deixadas de pais para filhos, palabras essas que tienen bida, puorque dizan respeito ls sous trabalhos na agricultura, a la sues delores i a la sue fame, nalguns casos.
Muito oubrigado Ana Maria, por tantas sugestones i, spero que cuontinues a dar cuontinuidade a aqueilhes, cuomo José Leite de Vasconcelos, que cuontribuiran para l zambolbimiento de la nuossa querida lhéngua mirandesa.
Un abraço de l tou amigo Leonardo.

Ana Maria F 7 de junho de 2008

editada dia 07-06-2008 20:42:42 por: Ana Maria F

editada dia 22-11-2007 10:48:31 por: Ana Maria F

Eicelentíssemo Sr Leonardo,

Acho amportantíssemo cuntinar este diálogo subre la Lhéngua Mirandesa i un pribilégio tamien, ua suorte berdadeiramente, poder dialogar tan facelmente grácias a este nuobo meio de comunicaçon straordinairo que tenemos agora al nuosso alcance que ye l’Anternete, cun pessonas cumo ye l sou caso, Sr Leonardo, amplicadas an associaçones çtinadas a balorizar i a dar a cunhecer a todos essa nuossa Lhéngua de siempre, la Lhéngua de nuossos abós i de nuossos pais : la Lhéngua Mirandesa .
Scribo hoije para sugerir tamien ua cousa… Mas talbeç nun seia nobidade ningua , talbeç yá outros téngan pensado naqueilho que bou a dezir agora, ou talbeç até yá seia tarde para realizar aqueilho que bou aperponer… Bamos a ber…
Para l anho que ben, an Julho eisatamente, bai a fazer 150 anhos que naciu un de ls purmeiros mais grandes ambestigadores (Talbeç la palabra nun seia eisagerada) de la Lhéngua Mirandesa ; quiero falar de José Leite de Vasconcelos que naciu, cumo mos splicou nun hai muito tiempo l Porsor Amadeu Ferreira aqui mesmo neste site, an Julho de 1858 i que faleciu an 1941.
Pensando bien, este anibersairo podie i deberie ser até un bun pretexto para las associaçones cumo la que preside, que ténen cumo objetibo la promoçon de l Mirandés, ourganizáren comemoraçones ouriginales i de culidade çtinadas mais ua beç a dar a cunhecer, balorizar, dibulgar essa nuossa Lhéngua i transmitir tamien a outros, muitos outros, l gusto de la cunhecer, de la falar, de la scribir i de la daprender : cun quelóquios, palestras, sposiçones, leituras de testos, reportages, i mais outras einiciatibas, nun squecendo (esso parece-me tamien mui amportante i até eissencial) un cuncurso, por eisemplo, an colaboraçon eibidentemente cun bários ministérios cumo l de la Educaçon i l de la Cultura, antre outros, çtinado als mais nuobos, alunos de las scuolas primairas i secundairas i studantes de las ounibersidades tamien cun la ouportunidade de ganháren até alguns prémios: libros, biages de descubierta de las tierras de Miranda para turmas anteiras de bárias zonas de l país até…
Ye neçairo berbas para realizar esso todo ?
Nun haberá anton tamien a níbele ouropeu organismos çtinados a promober i ajudar até financeiramente einiciatibas cumo essas ou até associaçones cumo la que preside, sr Leonardo, que ténen cumo objetibo la promoçon de l Mirandés ?

Ye berdade tamien que hai cousas que ban a tener que mudar nesse país. Inda nun hai muitos dies, li un artigo aqui an França que me chamou muito la atençon. Todo l que acabemos de falar ten a ber diretamente cun la Cultura… Ora, segundo Eurostat, l gabinete ouropeu de statísticas, parece que Portugal ten la segunda percentage de la populaçon atiba a trabalhar ne l setor de la Cultura (solo 1,4 %) mais baixa de toda la Union Ouropeia, apenas precedida pula Roménia…
L Mirandés, cumo Lhéngua i cumo Cultura, podie i deberie ser tamien la possibilidade de abrir perspetibas de criaçon de ampregos…
A nun ser que nos resignemos (Ye esso que queremos ?) i achemos nós tamien, Ouropeus cun raízes antretanto nessas Tierras de Miranda, que nun faç mal ningun quedarmos siempre atrás de ls outros cumo giente atrasada que seriemos mesmo anton, cun l risco de zaparecer afinal un die de l mapa cultural i lhenguístico desse país yá bien atrasado anton tamien an termos de ampregos ne l setor cultural cumparatibamente als outros estados membros…
La situaçon ye mais grabe que l que you pensaba mas nun penso solo ne l Mirandés.
Tenemos todas las rezones de reagir anton .
Yá 150 anhos, José Leite de Vasconcelos dixo quatro berdades.
Se hoije nun mos mexemos, nun acredito, you pessonalmente mas Dius queira que m’anganhe, que daqui a 150 anhos inda haia pessonas cumo hai hoije para la falar cumo la falamos inda hoije, la Lhéngua Mirandesa.
Inda hoije tenemos cuncéncia de todo l antresse que yá tubimos i sentimos an poder oubi-la falar i falá-la nós tamien.
Nun ye esto razon bastante para abaliar bien l que representa anton tamien la nuossa respunsabilidade an sermos capazes an transmitir essa lhéngua que yá outros (nuossos pais, nuossos abós…) mos transmitírun ?
De l que ye que precisamos mais ? Que outros mos abran ls uolhos porque nun somos capazes de ls abrir nós próprios? I para retomar ua citaçon de l mesmo Leite de Vasconcelos: "Talbeç depuis yá seia tarde !"

Cumprimentos para l grande defensor de la Lhéngua que ye, Sr Leonardo, yá mos demos todos cunta. Muitos cumprimentos para si .