La Stória

1. José Leite de Vasconcelos, l purmeiro studioso de l mirandés, stubo an Sendin ua sola beç, an Setembre de 1884, i por ua sola nuite. Culs eilemientos nessa altura arrecolhidos publica, na 1886, las purmeiras notas subre l sendinés i ua pequeinha cuntica (Línguas Raianas de Tras-os-Montes, succintas notas philologicas, Porto, 1886). Nun mos diç quien le dou las anformaçones que arrecolhiu, mas dá para antender que fúrun mui poucas.

Uns 15 anhos apuis de haber stado an Sendin, an 1899 / 1900, José Leite de Vasconcelos arrecuolhe nuobos i mais zambolbidos eilemientos subre l sendinés, sendo sous anformantes ls armanos Francisco Maria Guerra i Aleixo Guerra.

2. De ls dous armanos, fui Francisco Maria Guerra l percipal anformador de José Leite de Vasconcellos subre l sendinés, pus este mesmo mos diç que el le dá muitos eilemientos i notas (Estudos de Philologia Mirandesa, I, ix, 407; II, 35, 36, 39), cunsiderando que stá purparado cumo naide para fazer un bocabulairo i ua gramática de l sendinés (id. I, ix i 407; II, 35, 36, 42).

Quien era Francisco Maria Guerra? José Leite de Vasconcelos solo mos diç que era natural de Sendin i studante de l’ounibersidade. Ye al Abade de Baçal que bamos a saber doutros dados subre aquel sendinés: naciu a 11 de Outubre de 1876 i era filho de Valentim Guerra i de D. Baltasara Ramos Puente, naturales de Spanha; formou-se an dreito pula Ounibersidade de Coimbra an 1900; apuis bieno a bibir para Miranda de l Douro adonde fui admenistrador de l cunceilho, sustituto de l juiç de dreito, cunserbador de l registro predial, adbogado i xefe político; l die 10 de Júnio de 1918 casou-se cun D. Maria Zulmira Miler de Vasconcelos de Lemos, natural de Vila Flor (tierra adonde passou a bibir), de quien tubo trés filhos (Memórias Arqueológico-Históricas do Distrito de Bragança, VI, 730-731 i VII, 226). Ye inda l Abade de Baçal quien mos diç (id., XI, 334) que screbiu l libro “Aspectos Morais dum monstro de maldade”, an 1938.

Subre l saber de l nuosso outor quanto al sendinés diç José Leite de Vasconcelos: “Deixo ao Sr. Francisco Maria Guerra o cuidado de profundar o estudo scientifico do sendinês, como seu idioma natal que é. Creio que ninguem como elle póde dar-nos desde já uma grammatica desenvolvida e um vocabulário extenso d’este sub-dialecto” (Estudos de Philologia Mirandesa. II, 42). Francisco Maria Guerra tenerie, nesta altura, al redror de 23 ou 24 anhos. Cuido que José Leite de Vasconcelos talbeç haba eisagerado, nun solo porque Francisco Guerra nun era formado an lénguas, cumo nun era perfundo coincedor de l sendinés nin era falante desse dialeto de l mirandés. Al falar na «seu idioma natal» José Leite de Vasconcelos solo poderie querer dezir que era la léngua falada na sue tierra. Seia cumo fur, nun sabemos se Francisco Guerra, por bias de l’anfluença de José Leite de Vasconcelos, algue beç tenerá pensado an screbir algo subre l sendinés ou se tenerá arrecolhido algun bocabulairo. Tamien queda claro que José Leite de Vasconcelos nun tenie l’antençon de fazer nuobas ambestigaçones sube l sendinés, assi se habendo passado las cousas.

3. José Leite de Vasconcelos tamien mos anforma que Aleixo Guerra, médico i armano Francisco Guerra, mas dous anhos mais bielho i a bibir ne l Porto, le dou algues andicaçones subre l sendinés, an Outubre de 1900 (in Estudos de Philologia Mirandesa, II, 40). Talbeç cun esses eilemientos i ls outros antes arrecolhidos de l armano Francisco Guerra, José Leite de Vasconcellos tenga cumpuosto las páiginas subre l sendinés que bénen ne l 2º ambelume de ls sous Estudos de Philologia Mirandesa. L coincimiento que Aleixo Guerra tenerie de l sendinés nun serie mui defrente de l armano Francisco, balendo para el la abaluaçon que yá arriba fazimos.

4. Pul studo de ls dados relatibos al sendinés que José Leite de Vasconcelos mos deixou, son dados mui fracos l que tamien me lieba a poner an dúbeda la cumpeténcia de ls armanos Francisco i Aleixo Guerra subre l sendinés. António Maria Mourinho parece ser de la mesma oupenion pus diç que “Leite de Vasconcellos, nos seus Estudos de Philologia Mirandesa, II, 40-41, publica uma carta, mas com todas as incertezas ainda de representação gráfica, por não ter elementos precisos do sendinês, e os que lhe deram foram poucos e deficientes.” (in Nuossa Alma i Nuossa Tierra, XI).

Estas cunclusiones báten cierto culas anformaçones que arrecolhi an Sendin subre la família Guerra, tamien coincida por Ls Balentins: era possiblemente la família mais rica de Sendin na fin de l seclo XIX i purmeira metade de l seclo XX, dedicando-se al comércio i tenie ua amportante fábrica de tapones de corcha, sin cuntar culas tierras; era d’ourige spanhola (Fermeseille), de l percípio de seclo XIX i toda la giente diç que era família que nun falaba mirandés, sabendo algue cousa de oubir falar a las pessonas de l pobo. Muito mais poderiemos dezir subre esta amportante família sendinesa, mas esto chega para se fazer ua eideia de cumo éran mui scassos i fracos ls eilemientos de la léngua falada an Sendin an que José Leite de Vasconcelos assentou las sues cunclusiones. Cun tan fracos anformantes, nun admira que aquel eilustre sábio nin se tubira apercebido de algues amportantes caratelísticas de l sendinés.

5. José Leite de Vasconcelos publica alguns ditos arrecolhidos por Francisco Maria Guerra i ua carta screbida por el i que eiqui deixo, cula scrita segundo la Cumbençon (in Estudos de Philologia Mirandesa, II, 40):

Amigo Manuol:

Ne l domingo pula manhana tengo tencion de ir fazer-te ua bejita, por esso nun baias culas bacas, manda un rapaç culhas, que you tengo gana de falar cuntigo, i para esso debo star ende a las nuobe de manhana temprano. Bou alhá nun solo por ber-te, mas tamien para te pedir un fabor, porque bien sabes que you tamien serie capaç de te lo fazer an tales cundiciones.

Cumo te dixe l outro die, cumprei a Antonho Griguiro la casa que tenie an rue de las Frangas por nuobe libras; cumo you solo tengo siete, tenes de m’amprestar dues até al berano, que benda l centeno ó l bino, i antoce te las pago. Fui acupar-me cun Fracisco Binhon, i nun me las quijo amprestar; you bien sabie que las tenie, mas acá l aspero.

Até al domingo. Dá-le muitas bejitas a la tue tie, tous armanos i mai.

6. Anque la sue anformaçon tenga tubido falhas, nun hai dúbeda que als armanos Francisco i Aleixo Guerra se le debe l percipal de l que José Leite de Vasconcellos screbiu subre l sendinés, l que yá nun ye pouco i merece ser lembrado.

Amadeu Ferreira

Abiso: Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá screbido cun “L” an percípio de palabra, a la moda de l mirandés de Sendin.