La Stória

Zde l percípio de la nacionalidade i até la criaçon de la diocese de Miranda (1545), Sendin pertenciu al arcebispado de Braga. Ne l anho de 1438 sabe-se que stubo an San Pedro de Sendin l arcebispo de Braga, D. Fernando da Guerra. Passarie an Sendin ne l berano, talbeç Júnio ou Júlio, yá que a 1 de Agosto staba ne l Mosteiro de Castro de Avelhanas, acerca de Bergança. Esse mesmo arcebispo stubo, an outras alturas, nas seguintes tierras de Miranda: Mogadouro, Azinhoso, San Martino de l Peso, Miranda i Bumioso.

L nome ousado ye San Pedro de Sendin porque San Pedro era (i inda cuntina a ser) l ourago de Sendin. Nessa altura la fraguesie de San Pedro de Sendin pertencie a la Orde de l Spital, que apuis agarrou l nome de Orde de Malta. Por essa rezon, l abade de Sendin era apersentado por essa Orde. Habie casos de aldés na Tierra de Miranda an que las eigreijas pertencien al arcebispo (Çarapicos, Berçó, Lagoaça, Paçó, S. Cibron de Angueira, Miranda i Barceosa) i outras eigreijas que le pertencien ls rendimientos al rei (Barceosa, Miranda, Avelhanoso, Bilachana).

Fui tamien nesse mesmo anho, an Outubre de 1438, que se morriu l rei D. Duarte. Ne l anho atrás, an Outubre de 1437, dou-se an Marrocos l que quedou coincido cumo zastre de Tânger, an que quedórun presos muitos pertueses, antre eilhes l Anfante D. Fernando, un de ls filhos de D. Juan I, que habie de se morrer nas cadenas de Feç.

Cuido que l arcebispo de Braga nun quedarie an Sendin se la sue eigreija nun tubira ua cierta amportança, por bias de rendimientos que le premitíran recebir i dar de comer al arcebispo i a la sue quemitiba que habie de ser peca, i que tenie dreito a casa, cama, mesa i roupa lhabada, todo de l buono i de l melhor. Ye possible que la benida de l arcebispo a Sendin tubira a ber cun porblemas ne ls pagamentos de ampuostos (cumo las décimas de las colheitas i outros) que le éran debidos i que talbeç debedisse cula Orde de l Spital. La berdade ye que esse arcebispo las tubo granudas cul anfante D. Anrique que, an 1429, le querie roubar l’eigreija de Azinhoso, i tamien cul comendador de Mogadouro que le rapinaba las rendas de las sues eigreijas.

Trai la notícia de la besita de l arcebispo de Braga a Sendin, José MARQUES (1988), A Arquidiocese de Braga no séc. XV, Lisboa, Imprensa Nacional - Casa da Moeda. pp. 88 e 1084.

01 de Abril de 2006

Amadeu Ferreira