La Stória

1. Na guerra Peninsular (Ambasiones francesas), an 1808, las ourdenanças ténen un amportante papel na tierra de Miranda. La cidade de Miranda de l Douro stá sbarrulhada i abandonada, yá zde la Guerra de l Mirandun (1762): apuis de arrebentar l paiuol de la pólbara, Miranda queda sien Castielho, sien bispo i todo que a el staba ligado.

Agora, an que se spera l’antrada de ls franceses pul lado de la raia seca, ye la Cámara quien todo tremina quanto a la defénsia de la cidade i de l termo, formando l Cordão de la Raia, a 25 de Júnio de 1808. Anque la cidade steia ne l stado que dezimos arriba, diç-se que ye amportante defender Miranda «por se achar nella cofres com dinheiros e pratas». Hai que «guarnecer a cidade, desmantelada, sujeita não só a ser invadida pelo inimigo mas também a insultos dos diferentes bandos de dezertores e salteadores de que abunda a Hespanha». La Cámara nun ten nada cun que se çfender i pide-le «polvora, balla e armas para as ordenanças» a la Suprema Junta Provisional do Governo, por bárias bezes. Diç la Cámara que assi quier «acautellar qualquer ataque não só na cidade mas nos povos da raia e do interior deste termo». Mas cumo nun recibe repuosta, la Cámara «julgou mais opportuno recorrer à Junta do Armamento e Defeza da cidade de Çamora que não duvidará prestar o sucorro necessario por defenderem ambas as potencias hua causa, que lhes he comua, em que tanto interessão para a sua independencia e que a amizade e liga entre ellas contrahida deve (por assim dizer) reputar-se hua só familia...».

Anquanto la ajuda de Çamora nun ben, oubriga ls ferreiros i serralheiros a ajudar las ourdenanças a cumponer las armas que stéian derramadas, al mesmo tiempo que se píden las armas que ls particulares tenien. Stamos a 27 de Júlio de 1808, nua altura an que las colheitas de l pan stában na sue mais grande fuorça.

2. Ne l Cordão de la Raia tamien hai porblemas an tener pan pa le dar als homes que çtacados para ourganizar esse Cordon. Toda la giente ye chamada a ajudar, subretodo las Ourdenanças, formadas por peizanos de las aldés, mas habie tamien ua guarniçon solo de curas i frailes, quemandada pul abade de Dues Eigreijas, Antonio Marquez Gomes.

A 17 de Agosto de 1808 mandam-se fazer an todos ls lugares de l termo, i subretodo ne ls de la raia, «fogueiras de ervas ou arbustos aromaticos para se dissipar e purificar o ar corrompido ou infestado de corpos mortos que em rio Seco ficarão no tempo da batalha». Essas fogueiras tenien de ser feitas de trés an trés dies durante un més i debien de ser feitas nas rues. Mas cumo era berano i habie miedo que las fogueiras pegássen fuogo, tremina-se que «em lugar de fugueiras de chama sejão fugueiras de fumo».

3. Nesta mesma data 17/8/1808 mándan albantar l cordon de la raia, pus la cousa parecie star a çcampar. Assi i todo, las pessonas nun son mandadas para casa, pus decíden «continuar a guarnição da cidade com mais suavidade se devia formar hua lista, ou escala geral das ordenanças do termo para que alternativamente se va distribuindo a guarnição da mesma cidadae sem excepção de pessoa algua, que não esteja impedida legitimamente». Esta orde para cuntinar a defender la cidade, nua altura an que ls franceses parecien yá ouferecer peligro, Trouxo grandes albrotes antre las ourdenanças. L mais amportamnte albrote fui que se chamou la “Insuburdinação e rebeldia que tem praticado as ordenanças do lugar de Sendim”. Na la ata de la reunion de la Cámara de Miranda de 27 de Agosto de 1808, l que se passou ben assi cuntado:

- “presente o officio do sargento mor das ordenanças com data de vinte e sete do corrente, no qual expunha a insuburdinação e rebeldia que tem praticado as ordenanças do lugar de Sendim para se tomarem as medidas que parecerem adquadas para serem castigados, e como para se proceder com justiça e sem precipitação se julgou conveniente mandar ao capitão da mesma companhia que sem perda de tempo remeta hua rellação formal de todos os individuos do dito logar que não tem obedecido ás ordens que elle lhes tem participado para o fim de virem guarnecer esta cidade, informando-se exatamente com os officiaes seus subalternos, para se não excluir pessoa algua que tenha sido desobediente pena de elle ficar responsavel pela mais leve culpa ou omissão e que se lhe communicasse pelo secretario desta Junta.”

Cuido que este albrote de las Ourdenanças de Sendin, que nun éran outra giente que las pessonas de pobo cun mais fuorça para trabalhar, nada ten a ber cun ua cierta ribalidade de que se fala antre Sendin i Miranda. Todo se splica pul tiempo an que stamos, yá que era la fuorça de la trilha i las pessonas tenien que tratar de sue bida, que hai que colher ne l berano para comer no eimbierno senó será fame pula cierta. Nesta altura de l anho todo l tiempo ye pouco para arregressar cousas para casa i dende que solo se puoda botar las colheitas a perder se houbir mesmo peligro mui fuorte. Assi, antende-se bien l albrote de las Ourdenanças de Sendin, yá que ls mandantes de la cidade nun tenien esse porblema i amóstran falta de sentido nua altura daqueilhas.

Se l albrote an Sendin fui mais fuorte, la berdade ye que l mesmo porblema se passou cun outras aldés. Tanto ye assi que, uns meses apuis, an 24 de Janeiro de 1809, an sesson de Cámara, quando se resuolbe tornar a chamar las ourdenanças de las aldés de l termo, ten-se bien cuncéncia de ls porblemas que esso trai a las pessonas. Por esso se diç na ata de la Cámara: «he necessario recorrer às ordenanças no que demonstrarão talvez descontentamento dos povos, não só pelo seu incomodo mas pelo prejuizo da agricultura». Portanto, l prejuízo de pobos, que bibien de l’agricultura habie de ser bien grande. Por esso píden que baia para Miranda l regimento de melícias de Muncorbo. Sabe-se que nessa altura l porblema de la falta de armas i muniçones cuntinaba, «não havendo qualidade de munição algua», cumo se dixo na ata de la Cámara.

4. A 22 de março decide la Junta tornar a fazer l Cordon de la raia, mas agora ls termos an que se cháman las pessonas yá son outros: «era de primeira necessidade não só conservar-se o cordão e as companhias de caçadores que lá assistem e tambem aumenta-lo segundo as forças o permitissem com as ordenanças sircumvizinhas devendo consequentemente puxar-se a esta praça os que puderem dispensar-se da terra debaixo». Cumo ye sabido, Sendin faç parte de la tierra de baixo.

5. I queda este eipisódio sien outros comentairos, yá que quije subretodo cuntar, an resume, l que se passou i splicar las rezones de l albrote de las Ourdenanças de Sendin, que me parece que fazie todo l sentido, para nun passar un anho de fame nua altura an que l peligro de guerra nun era tan fuorte.

Las notas de l testo que quédan antre aspas son sacadas de Francisco Manuel Alves (Abade de Baçal), Bragança. Memórias Arquelógico-Históricas do Distrito de Bragança, Tomo IV, ed. Câmara Municipal de Bragança e Instituto Português de Museus, Bragança, 2000, p.146-160.

9 de Agosto de 2006

Amadeu Ferreira

Abiso:

Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.