La Stória

Quando se scribe la stória de ua tierra tem que se falar de muita cousa. L património ye ua de las partes mais amportantes. Ye de ua parte de l nuosso património que bos bou a screbir hoije.

En 1977 fiç un studo subre ls azuleijos de la staçon de Sendin i muito me ajudou l angenheiro Genestal Machado que me dou ls dados que me fazien falta.

Nun bamos a falar de quien ye responsable por l stado a que chegou la staçon, mas guardei ls retratos de ls azuleijos i eiqui bos queda l que scubri. Hoije inda hai alhá alguns i ls outros póden-se cumponer.

Ls azuleijos fúrun pintados por Gilberto Renda que naciu ne l fin de l seclo XIX, en Seixas, ua tierra que queda no Minho.

L sou ouficio era “cenógrafo”, studou en Paris i trabalhou cun l coincido pintor “Salgado” que quedou famoso en azuleijos i cumponiu l palaço de Queluz.

Gilberto Renda dezenhaba l scaleto de las figuras i apuis besti-las a la moda de l tiempo a que dezien respeito. Chamában-le “o menino prodígio”, era de statura pequeinha i magro.

Pintou tamien ls azuleijos de la staçon de Dues Eigreijas i de la de Caminha. Fizo inda un trabalho na calçada de la “Boa Hora” en Lisboua, este trabalho tamien yá zapareciu.

Ls retratos de ls azuleijos de la staçon de Sendin stán nas ultimas fuolhas de l lhibro “Em volta de uma espada” eidiçon de la Câmara de Miranda de l Douro.

Sendim, 15 de Abril de 2007

José Almendra

LA FUONTE DE L LHUGAR

La sue costruçion ye d´ourige romana, puis tén la forma de la de Quintanapalla (Burgos) i de la “fuente del toral” de Muga de Sayago (Zamora), a la qual ls arqueólogos ténen cumo tal (1).

Ye tamien armana a la de Almaraz del Duero (Zamora) (2), a la que faç parte de la reconstrucion de la “villa” romana de Chedworth (Anglaterra) i a la de Vale de Telhas (Mirandela), que tén an pie deilha un marco milenário, cumo se puode ber ne l retrato, al fondo, de l lado squierdo (3).

La nuossa fuonte fui recunstruída an la Eidade Média i mais tarde fui limpa i amanhada por nós, quando éramos perjidente de la junta de la fraguesie de Sendin. Parece que apuis le labórun la cara, mas sfregórun cun tanta fuorça, que anté le apagórun la era, que staba al fondo i que, por aqueilho que a mi se me lhembra, era MC.., talbeç de la recunstruçion Mediabal.

Fui an 1978, que çcubri na Biblioteca de Çamora l que bos stou a cuntar.

Estas fuontes stában, quaije siempre, acerca dua strada romana o dun camino para ua “villa” romana. I, porqui acerca, passában bários. Por esso, hai quien pense que l nome Sendin ben de la palabra goda Sinth – Sind (via, caminho). Todos ls Sendin´s, de Pertual, que coincemos, stán acerca dua ancruzelhada de caminos romanos. Deixo esto pa ls antendidos. Mas, cuido que Carlos Ferreira yá dou la splicaçon na sue tese de mestrado i cun la qual you cuncordo an absoluto. La splicaçon ben ne l mesmo sentido que yá ne ls anhos 80, you defendie ne l boletin de l centro cultural de Sendin ( “Villa Sendini” ).

Mas bámos a la fuonte (4).

Ten la forma dua casa cun telhado a dues augas, na frente i na traseira béien-se dous arcos, l de trás stá hoije cerrado.

Ye toda an piedra cun medidas própias de la cantarie romana (5).

Las sues medidas por fuora son estas:

- medida de la frente 3,40m

- medida de fondo 3,20m

- lados de l triángulo eisóceles de l telhado, na frente, 2,00m

- raio de l arco de la bóbeda 1,20m

- altura de ls muros laterales 1,20m (éran mais altos, mas al fazéren la rue quedórun mais anterrados).

- la cornije 0,20m

La parte de drento ye toda en bóbeda de canhon.

L mais de las fuontes ten cinco piedras an cada arco, mas la nuossa

ten uito, l que quier dezir que la acrecentórun quando la recustruírun (6). Se mirardes bien pa l arco, bei-se bien la eimenda, an riba, i queda un cachico abangado. Serie dessa altura la era que staba nua piedra de l arco de l fondo.

Ten, delantre deilha, un depósito que an tiempos serbiu para buber l ganado.

Hai ua pa ls lados de Mundin que se aparece cun eilha. Ye mais pequeinha i nun tén depósito, mas dessa falaremos noutra oucasion.

Tenemos que ir screbindo algo para que la nuossa mimória nun se perda.

Sendim, 20 de Março de 2007

José Almendra