1. La purmeira notícia scrita que ye coincida subre Sendin ten la era de 1258 (10 de Dezembre), reinaba an Pertual D. Fonso III, coincido cumo L Bolonhés. Este rei resolbiu fazer un grande anquérito para saber la situacion de l reino, subretodo se habie quien andubisse a roubar tierras al rei, rezon por que cada un habie de fazer proba de las sues porpiadades i dreitos. Esse grande anquérito quedou coincido na stória cumo Anqueriçones de D. Fonso III.

Trascriçon de las Anqueriçones de Don Fonso III (liv. 2º. fls. 106v a 112 subre l julgado de Ulgoso, tal cumo aparécen an Francisco Manuel Alves (Abade de Baçal), Bragança. Memórias Arquelógico-Históricas do Distrito de Bragança, Tomo IV, ed. Câmara Municipal de Bragança e Instituto Português de Museus, Bragança, 2000, p.11.

Notas al testo de las Anqueriçones:

i. Sendin aparece nas Anqueriçones al julgado de Algoso, que pertencie a la Tierra de Miranda i pertencie a la Orde de l Spital (apuis chamada Orde de Malta).

ii. Sendin aparece scrito cumo Sandim, mas por muitos anhos l nome nun tubo forma cierta, yá que hai decumientos adonde que aparece tamien cumo Sindym i Sindim.

iii. La bila de Réfega ye la Quinta de Réfega que hoije pertence al cunceilho de Miranda de l Douro.

iv. Ls frailes de Alcanhiças éran ls Templários, que tenien la sue sede naqueilha bila spanhola. A eilhes le chegórun a pertencer las aldés de Abelanoso, San Juanico i Bal de Frades, que agora perténcen al cunceilho de Bumioso, mas tamien la Quinta de Réfega, cumo se diç neste decumiento.

v. D. Nuno de Çamora era un nobre spanhol que tenie bárias tierras an Pertual, ne ls atuales cunceilhos de Miranda de l Douro (cumo Malhadas) i Bumioso.

vi. L Mosteiro de Moreiruola pertencie a la Orde de Cister i quedaba acerca de Çamora, mais ou menos 30 Km. Inda hoije se puode ber alhá l sbarrulho, acerca de l’aldé chamada Granja de Moreruela, na strada que bai de Zamora para Benavente. Esse Mosteiro era duonho de bários lugares na Tierra de Miranda, cumo Palaçuolo, Eifanheç, Custantin, Angueira, i tenie inda porpiadades noutras tierras.

vii. D. Tello Fernandiz era un fidalgo a quien D. Çáncio I, 2º rei de Pertual, le dou l vilar de Angueira an pagas de ls buns serbícios que le habie feito. Nun se sabe bien la era an que esto se passou, mas haberá sido antre ls anhos de 1185 i 1211. Uns anhos apuis, an 1246, las filhas i filhos desse D. Tello bénden-le la metade de Angueira (aldé que agora pertence al cunceilho de Bumioso) al Mosteiro de Moreiruola pul précio de 300 marabedis.

2. Sendin nun fizo parte de las tierras que fúrun ambestigadas nas Anqueriçones de D. Fonso III. Cumo puode ber-se ne l testo de las Anqueriçones, l rei tenie mais rezones de queixa an relaçon a las tierras que quedában acerca de la raia, yá que, nesse tiempo, nun se sabie mui bien por adonde passaba la debison cul Reino de Lion i ls nobres i cumbentos de l outro lado de raia todo fazien para abocanhar mais algues tierras que quedában deste lado. Por esso, nun se puode dezir que Sendin nun fizo parte de las Anqueriçones por nesse tiempo inda ser tierra pequeinha i de pouça amportança. Ye bien de ber que nesse tiempo, to las tierras de parqui nun habien de ser mui grandes.

La berdade ye que Sendin yá nesse tiempo pertencie a la Orde de l Spital (que apuis se passou a chamar Orde de Malta) que tenie la sue sede an Algoso. Talbeç seia essa la rezon por que Sendin nun fizo parte de las Anqueriçones.

3. Quien era Fonso Roixo, ye cousa que nun hai meia de saber, pus l testo nada mos diç quanto a esso. Ua cousa ye cierta: ye l nome de l sendinés mais antigo que coincemos pus, se fura bibo, tenerie hoije arrimado a 800 anhos. Poderemos manginar que nun serie ua pessona qualquiera, pus amostra tener muito coincimiento de la situaçon de las tierras alredror i a quien pertencien, cousa que nin to la giente haberie de saber. Esses coincimientos le habien de benir de las sues funciones, que nun sabemos quales éran, ou de ser un home biajado por aqueilhas redondas, l que poderie tener a ber cun muitas rezones. Mas todo l que puodamos dezir nun passará de eimaginaçon.

Assi i todo algues cousicas se puoden dezir a respeito de l nome de l tiu: la purmeira ye que l nome Afonso / Fonso era mui quemun naquel tiempo – até fui nome de alguns de ls nuossos reis – i que inda hoije an Sendin hai famílias cul nome Fonso, l que nun quier dezir que téngan algo que ber cun aquel sendinés de l seclo XIII; la segunda cousa ten a ber cul nome Roixo, que serie ua nomeada, mas esta palabra ne l seclo XIII nun tenie bien l mesmo sentido que ten hoije, mas mais l sentido de burmeilho scuro (de l latin russĕus 'burmeilho scuro’). Dende que esse tal Fonso tenerie la nomeada de Roixo por bias de la quelor de la piel algo burmelhusca. I giente cula piel dessa quelor inda hai por ende muita, al menos na ciertas oucajiones.

L nome Roixo pon un outro porblema: dízen bários outores que nun aparece antes de l seclo XVI, l puode querer dezir que la leitura de l nome feita pul Abade de Baçal nun stará cierta i será Roxo an beç de Roixo (José Pedro Machado, Dicionário Onomástico Etimológico da Língua Portuguesa). Mas ye un porblema que nun ye amportante pa l que aqui mos antressa, nin se quier fazer eiqui un studo de las Anqueriçones, mas solo deixar esta purmeira notícia de Sendin.