L gromo, l sol i la frol de pereira
Las Arribas de l Douro
Carlosferreira · 24 de abril de 2006
Uolhos ancandilados pula luç de berdes eilétricos, agarbançados. Amarielhos salta rostros, burçudos an ganas de medrar.
Berde terruonho i frol de pouca dura, antes de caier, arder, queimar, tresformar.
Trúnios, zamburinadas, çcampado, Márcio i Abril, madrugada, raiar.
Ambierno finado, pulgar a chorar,
Raiç aceçonada, benas a lebar.
Tuoro cumo niu a chocar.
Sol, antes d’abranar.
Bino fino, a zampolhinar.
Gema, gromo, a spertar.
I apuis l sol fui-se, porque ls gromos querien drumir pa medrar.
L sol bai-se to ls dies, amporta-se el bien que ls gromos drúmen!
I las froles de pereira? De nuite nun ténen branco i l sol assi queda triste.
Pa nun pensar nesso l sol deitou-se de l lado de ls brancos de la frol de pereira i por cousa desso, de l outro lado de la tierra, l sol passou la nuossa nuite an branco.
Carlos Ferreira
