Na Dega hoube proba de bino i stubírun sócios, giente de bárias tierras i alguns de la Cooperatiba de Freixo.
Tamien stubírun membros de la Confrarie de Bino de Trás-os-Montes, ls sócios que ténen las binhas certificadas i membros de la anterior direçon.
Antes splicou-se que l nome “douro” yá puode ser outilizado ne ls cunceilhos de Miranda i Mogadouro.
La giente que stube presente
Ls mais antendidos bebien an copos de bidro
La proba fui de todos ls tipos de bino que ten la Dega. La Junta de Freguesie colaborou dando presunto, queiso, nuozes i castanhas. La proba fui para todos ls que quejírun, mas para ls mais antendidos fizo-se ua proba special.
La einóloga a splicar al antigo presidente
Ne l fin falórun ls antendidos i quedórun cuntentos cun la calidade de ls nuossos binos. Mesmo ls de Freixo acabórun por dezir que ls nuossos binos an nada quedában a deber als de la sue Cooperatiba.
Ls sócios presentes tamien gabórun la einóloga i la direçon, por l trabalho que ténen feito para que la Dega tenga tan buonos binos.
Ls presidentes de Junta presentes tamien se referírun a todo l trabalho que se ten feito na Dega i dórun ls parabienes a la direçon.
