Hoije bou a falar-bos un pouco de la nuossa léngua. Ben esto a prepósito de l que screbi die 4 i que fizo cun que recebísse alguns quementairos, que cuido son l que pensa mais giente.
La fala i la scrita nun son bien eiguales i l sendinés nun ye mirandés, diç-se .
L retrato que pongo a seguir ye de cousas de la scola.
La scola
Cumo podeis ber, “lápeç” ben scrito “ lhápeç ”, esta ye ua de las çfrencias antre l mirandés i l sendinés, mas la adenda a la cumbençon yá ressalba esso.
Eiqui, eirei dando alguas splicaçones para melhor daprenderdes la nuossa léngua. Por sermos un pouco houmildes i recoincermos las nuossas hablitaçones lenguisticas, nun puode ser anterpretado cumo nun sabendo nada.
Estas ties solo falában an mirandés(sendinés)
Ye zde garotico, que oubo falar grupos cumo este i inda hoije assi assucede, ye l sendinés la léngua que fálan antre eilhas.
Se ye cierto que la léngua ten que se screbir cumo se fala, tamien nun ye menos berdade que, para la léngua ser credíble, ten que tener reglas. Por esso se fizo la cumbençon .
Un garotico de Costantin na scola de mirandés
Subre l “ l ” quiero dezir-bos :
An sendinés, l “ l ” latino nun se palatizou cumo an mirandés:
Sendinés: - lápeç -léngua –luna -lume -lobo …
Mirandés: - lhapeç -lhéngua -lhuna -lhume -lhobo …
Manhana cuntino, mas quiero dezir-bos trés cousas para bien de la nuossa léngua:
1 – L sendinés, cumo yá habie dito Leite de Vasconcelos, ten muitas palabras que se çferencian de l mirandés, l que l torna nun dialeto próprio.
2 – L sendinés ye un dialeto mais próssimo de l mirandés que de l pertués, lougo ye ua parte amportante de la léngua mirandesa.
3 – Ls que scríben i fálan, l sendinés i l mirandés, ténen que trabalhar junticos, para la léngua mirandesa i l sendinés tenéren feturo.
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
