L die 19 de Márcio ye l die de San Jesé i durante muitos anhos fui cunsiderado die Santo de guarda, mas cul tiempo deixou de ser die feriado, mas an Sendin inda cuntinou a guardar-se alguns anhos. Ultimamente solo alguns tius l guárdan. Hai alguns Jesés que neste die nun trabálhan.
Ne ls últimos anhos passou a ser l die de l pai (you scribo pai i nó padre cumo dízen an mirandés, mas an sendinés ye pai ). Solo hai pai se houbir familha.
Esta ye ua scultura de un sendinés
Neste die, por todo l lado se dan cumbites als pais i ls filhos, cada beç menos, ban a besitar ls pais ou telifónan. Dantes habie missa i percion cun San Jesé. Mas tamien ls padres (curas) trabálhan i por esso yá nun ténen tiempo para estas cousas. Hai quien querga dezir que las perciones son cousas antiquadas, al mesmo tiempo que dízen que se dében mantener las tradiçones i que se debe respeitar la libardade religiosa. Que risa me dan…
San Jesé ne l altar
Muito habie que falar deste altar i de l de Nuossa Senhora de l Rosáiro, que fúrun feitos ne l mesmo tiempo i por ls mesmos artistas. Mas algua giente, que ten studado i screbido subre esso, pouco ou nada adelantrou. Perdírun-se ls decumentos i l que se sabie de la tradiçon oural. Mas bamos a ber se inda se faç algo.
L altar
Quando daba scola, neste die, fazie un trabalho cun ls alunos i bou a screbir un que traduzi para sendinés. Fui ua garotica de 9 anhos que l screbiu:
L die de l pai ye die 19 de Márcio.
Debemos de dar un cumbite a nusso pai i aqueilhes que nun podíren dar cumbites, dan carinho.
Miu pai ye miu amio i you dou-le carinho todos ls dies.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
