L die hoije staba tan perro que me lembrou de un dito dezideiro que houbi muitas bezes i por l que you fui bendo al longo de ls anhos ye berdadeiro.
An Márcio quatro mudas fizo l die:
Fizo sol i anubrou,
Chubiu i scarabanou|…
Fizo sol
L die 16 tube l cuidado de ir tirando retratos durante todo l die i mirai bien a ber se nun ye berdade.
Eran las 17h32 quando tirei este retrato. Scolhi ls melhores i por esso nun ls pongo por la hora an que ls tirei, mas por ls que melhor móstran l que diç l dito.
Anubrou
Este fui a las 12h13, yá habie feito sol i ampeçou a anubrar i durante todo l die houbo de todo.
Ls ditos dezideiros nun aparecírun sin mais nin menos. Muitas bezes ye que queremos que ditos de outras tierras séian tamien nuossos, mas cada tierra cun sou uso i cada roca cun sou fuso.
Chubiu
Chubiu i nun fui pouco, este retrato fui tirado a las 16h43. Son estes studos que nun ye perciso andar na ounibersidade para ls fazer. Muitas bezes defénden-se teses i l que se fizo fui preguntar a ls mais bielhos, mas dan mais balor al que un qualquiera scribe, que al que l pobo studou i trasmitiu ouralmente, durante miles de anhos.
Scarabanou
Este fui tirado a las 10h20.
Tamien ye berdade l que se hoube dezir an muitas tierras de ls alredores de Sendin:
“Márcio ye cumo aqueilhes i aqueilhas que quieren ser buonos, mas la oupenion nun ls ajuda…”
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
