Ne l die 9 de Maio de 1950 fui apresentada, por Robert Schuman, ua porpuosta de criaçon de ua Ouropa ourganizada, la qual quedou coincida por la “Declaraçon Schuman”.
Este die marca l ampercípio de la, agora, Ounion Ouropeia (UE) i fui por esse motibo que na Cimeira de Milan de 1995, fui adotado l die 9 de Maio cumo l die de la Ouropa .
La bandeira de la Ouropa
Este die ye comemorado an todos ls paízes de la Ounion Ouropeia i Pertual nun queda atrás i mesmo na nuossa EBI, ls alunos i porsores quejírun lembrar este die cun trabalhos i aulas subre la Ouropa. L HOIJE, cumo ye costume, stá siempre atento i stube culs alunos i porsores na EBI.
Ua aluna a falar subre la UE
Por todo l lado habie cartazes, bandeiras i trabalhos feitos por ls alunos, subre la Ouropa i subre las leis i anstituiçones de la Ounion. La porsora Cremilde tamien falou subre la amportancia de las anstituçones de la Ounion Ouropeia, mas fazie todo por séren ls própios alunos a splicar l que habie ne ls cartazes.
La porsora Cremilde a falar
Ls alunos cun todo l atento
Tamien houbo bidios i cunfrencias, nas bárias turmas, subre las politicas de la Ounion. Estas açones son mui amportantes para ls nuossos moços i moças sabéren l que ye la Ounion i las bantages que ten para todos.
Tamien oubi falar de ls porblemas que la Ounion puode traer l que ye tamien amportante, para ls alunos formáren la sue eideia.
L mapa feito po ls alunos
Ls trabalhos
Cuido que l HOIJE bai sendo cada beç mais amportante, porque mostra als que stan fuora, que eiqui tamien hai trabalho ne l ansino, na cultura i ne l çporto i que ls nuossos moços i moças, cun la ajuda de ls sous porsores ténen ua formaçon maior que muitos pénsan.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
