Onte fui l salimento de l libro, L Segredo de Penha Campana , an Sendin, na Casa de la Cultura, scrito por Amadeu Ferreira i cun dezeinhos de Sara Cangueiro, para ls alunos de las nuossas scolas. L libro ye para ls alunos de mirandés, an special i para toda la giente an giral. L scritor ye sendinés i nun percisa de apesentacion i la dezenhadora ye filha de un sendinés. Solo esto bonda para ser ua nuoba buona para todos ls sendineses.
L libro
Este libro faç parte de ua coleçon de libros de la Direçon Regional de la Cultura de l Norte, subre un tema que ten muito a ber cun la perserbaçon de l ambiente i l eimaginário de ls moços i moças. L tema de todos ls libros ye mesmo anteressante – PINTAR L BERDE DE LETRAS – i para esso fúrun cumbidados scritores de bárias regiones de l paiç.
L representante de la Cultura, la representante de la EBI i Amadeu
Amadeu a splicar la cuonta
Stubírun quaije todos ls alunos de las scuolas, ls porsores, outoridades i l HOIJE .
Amadeu splicou la cuonta de libro i liu alguas partes para ls alunos. L libro ye an mirandés, mas ten la traduçon an pertués. Parece que todos gustórun. You quedei cuntento por ber todos felizes i tamien porque me dórun un libro outografado por l outor.
Ls alunos cun atento a oubir
I ls maiores tamien
Inda hai respeito i eiducaçon ne ls nuossos alunos i puodo dezir-bos que la nuossa scuola ye un eisemplo. Tenemos muitos alunos de ls alredores de Sendin, mas todos gústan de la nuossa scuola i de l Hoije nien se fala ( agaba-te cesto ) . Mas ls porsores tamien son buonos.
Un dezeinho de l libro
Nun staba la dezenhadora, mas staba la abó
La dezenhadora fizo ls dezeinhos, an quadros i apuis fúrun acopiados para l libro. Nas paredes de la Casa de la Cultura habie ua sposiçon de todos ls dezeinhos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
