L HOIJE ye ua referencia para ls nuossos moços i moças i para todos quantos stan loinje. I cada beç mais las pessonas se anteréssan por la nuossa léngua i por la nuossa tierra. L HOIJE ye un cachico de Sendin i se nun l léien nun die, noutro léien i béien todos ls que ténen atrasados. L HOIJE yá ye de todos, porque muitos son ls que todos ls dies partecípan nel.
Estes yá se ándan a treinar
Die 1 de Junio ye l cuncurso de pesca çportiba ne riu Douro, ourganizado por la Associaçon de Caça i Pesca de Sendin i bai a ser an Mondin, onde stan las anstalaçones de la Junta de Freguesie i l ancuradouro de ls barcos, que l HOIJE yá bos mostrou ne l die 12 de Nobembre. Ls nuossos moços ban tenendo yá mais amor por l termo i por ls çportos, la proba ende stá.
L riu onde se bai a fazer l cuncurso
Mas l que you bos staba a dezir ye que l HOIJE yá ye de muitos i ls moços partecípan, cumo ye la nuoba deste die, an que eilhes quejírun mostrar que ne ls fins de semana yá ban porcurando l que tenemos de buono, l nuosso termo.
You pesquei dues carpas, dezie Pedro Xavier
I you outras dues, dezie Pedro Raposo
L die 1 de Junio queremos ganhar un prémio, dezien todos, mas l que amporta ye partecipar.
Mas antes hai que ir a la Trindade, que ye die 18 de Maio i tenemos que fazer raia cumo todos ls anhos. Ye assi que Sendin bibe, cum amisade i alegrie.
I que cousa mais linda que poner ua nuoba a las 22h30 i ua hora apuis star Zé Mealito a dezir-me al MSG, zde Angola, que al ber la sue huorta i las patatas nacidas que tenie quedado mais feliç?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
