Quando inda hai quien pense que porqui stamos tan atrasados que nin las pessonas sáben ler ou que nunca salimos de la rue onde moramos, ye buono que ampécen a amportar-se mais cun Sendin, que cun l sou umbelhigo. Nós bibimos, studamos, trabalhamos i lebamos l nome de Sendin bin loinje. Nun percisamos de calçar sapatos de salto alto, para ls outros mos béren.
Ls alunos de l IPB de Bregancia
Neste fin de semana houbo aulas sprementales de l curso de tequenologie beternaira de l Anstituto Politequenico de Bergancia. Sprementórun a tirar ecografies a las burras prenhadas i a ber por apalpaçon l stado de las burras que stában prontas para la cobriçon.
L beternairo a splicar cumo se faç
Neste retrato puode-se ber bien l aparelho de fazer las ecografies i l modo cumo se porpara l animal, preso por las patas, para que todo seia feito cumo debe de ser. Ls alunos i porsores stan cun todo l atento a la splicaçon de l specialista.
La burra apeada
Tamien aprendírun a capar ls burros i a tratar las femeas prenhadas. Todos sprementórun a fazer ls eisames i aprendírun l modo de eibitar las malinas que aparécen i se dében tratar ne ls períodos de cubriçon.
A fazer la ecografie
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
