Tamien la defensia de l ambiente stá bien portegida i son tomadas medidas que fázen todo para que l Parque de l Douro Anternacional, nun tenga grandes perjuizos cun las obras. Tamien hai outras associaçones que ajúdan, cumo la AEPGA i outras antidades que até l cumportamento de ls abutres durante las splosones stúdan. I nós tamien bamos acumpanhando.
Neste sitio l Hoije biu las pessonas anteressadas
Este ye un de ls sítios mais porblemáticos para l ambiente, mas quaije nin se daba cuonta que se stában a fazer grandes trabalhos. Anquanto ls tequenicos falában fui a ber la salida de l’auga de las obras i todo stá bien. La áuga chena de tierra ye filtrada i solo apuis ye que bai para l riu. A la dreita de l retrato bei-se bien.
La auga apuis de filtrada cuorre pal riu
Este ye l filtro de placas
La auga de la barraige sal por l túnel, porque stá a ser turbinada i a porduzir einergie eilétrica. Ye amportante scebir esto todo, porque inda hai quien cuide que sabe todo i que l que eilhes dízen ye l mais amportante, mas porqui yá hai pessonas amportantes que sáben l que ye la bida. Bai sendo tiempo de fazer mais causo de las cousas amportantes.
La salida de la auga de la barraige
Porcurei saber l que se staba a fazer para defensia de l ambiente i até l cumportamento de ls abutres, a quando de las splosones ye oubserbado. Mas cumo parece que todo se faç para que l risco seia l mais pequeinho possible, zbiei-me un pouco para ousserbar bien i mirai l que retratei por riba de nós – trés abutres a fazer ruodras.
Ls abutres
Habie muito que falar, mas esto ye un pequeinho jornaleco, mas bai dando cuonta de l que bai acuntecendo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
