Onte fui l die nomeado de l Cuorpo de Dius. Era este por toda la tierra de Miranda l die nomeado que todos guardában. Neste die naide trabalhaba a nun ser ir a regar ua huorta ou a fazer ls pequeinhos trabalhos que era oubrigatório fazer.
Ls pouliteiros
Ne ls finales de l séclo XIX era l die an que ls pouliteiros acumpanhában la precisson. I cumo José Maria Neto, ne l sou scrito “ rabiscos ”, ua pequeinha monografie de Miranda dezie, nesta precisson an todas las aldés i mesmo an Miranda, ls pouliteiros éran quien animaba la percion.
La percion de onte an Sendin
Ne ls últimos anhos l die ye scolhido para ls garoticos i garoticas fazéren la su purmeira comunhon i ls maiores fazéren la comunhon solene. Yá nun ban ls pouliteiros i an Sendin fui la fanfarra de ls bumbeiros que animou la precison.
Ua ouferenda na missa, an Miranda
La missa ye mui linda an todos ls sítios i an toda la parte las pessonas fázen deste die un die special. Apuis de las comunhones ajúntan la familha i fázen ua fiesta. You querie ancuntrar ua percion cun pouliteiros, mas yá nun fui possible.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
