La Associaçon WAVES Portugal, fizo este anho l sou II cungresso, ne l Praino. Neste cungresso stubírun mais de 70 pessonas de bários paízes i inda giente anteressada, que fui oubir ls cunfrencistas. L cungresso tubo la duraçon de trés dies.
L HOIJE cun ls ourganizadores
Apersentórun trabalhos bários porsores, de las ounibersidades de l Porto, Abeiro i UTAD de Bila Real i inda de la ounibersidade de León, de Spanha, falórun tamien l representante de la Direçon Regional de Agricultura de Trás ls Montes, l representante de la Junta de Castilha León, l representante de l Parque Natural de l Albon, l representante de l ICNB – Parque de l Douro Anternacional, l cordenador de l porgrama Antídoto-Portugal, la representante de Anstituto Ricardo Jorge, la representante de la direçon Giral de Beternaira i l representante de l Parque Nacional Lanin de Argentina.
La cunfrencista de la ounibersidade de l Porto, Claudia Almendra
Ls trabalhos realizórun-se na Casa de la Cultura de Mogadouro, onde stubírun cungressistas de Portugal, Francia, Spanha i Eitália.
Fúrun amportantes ls trabalhos subre ls jabalis, ls coneilhos i las malinas que ls ratos puoden apegar a las pessonas.
De las abes tamien houbo trabalhos anteressantes.
L cungressistas a tirar retratos a un bufo
L bufo ye ua abe que anda de nuite, nas arribas de l Douro, mas que fui possible ber-la ne l fin de l passeio de barco que ls cungressistas fazírun, an Miranda, porque ténen alhi un eisemplar domesticado. Ye ua abe que cumo se puode ber por l retrato ye grande i pesa quaisque 2kg. La fêmea, dixo l tratador que ye trés bezes maior.
L barco
L tratador cun l bufo
Cumo l tratador ye de Paradela i you sabie que falaba bien l mirandés, perguntei-le que nome l dában na sue tierra i la respuosta fui simpres:
-L mirandés ten quaije siempre las palabras ciertas para todo, ye BUFO, porque de nuite l sonido que fai, ye mesmo parecido cul nome. BOUFFFF…
Un sendinés a tirar l retrato al bufo
Apuis de l passeio de barco todo mundo seguiu para Sendin, onde fui l almuorço. Eisidro tratou a todos bien, porque ne l fin todos parecíen cuntentos, mas durante l almuorço inda dou para saber que yá ne l die atrás, an Mogadouro, habíen bebido bino de la nuossa adega i gustórun muito. Multo bono, dezie un eitaliano.
L almuorço
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
