L cungresso que se fizo onte, fui amportante porque truxe giente a la nuossa region, mas inda mais por las çcussones que se fazírun subre ls bários porblemas relacionados cun la salude, l ambiente, ls peixes, las abes i ls animales brabius. Houbo muita anterbençon que mos fazírun pensar. I la nuossa Dega yá ye eisemplo, an alguas cousas.
L nuobo armazén de pordutos químicos
Houbo un cunfrencista que falou de benenos i de ls cuidados que hai que tener. Tamien ls pordutos químicos ténen que star an sítios de modo a nun cuntamináren l ambiente. La Dega fizo un sitio dels melhores de todo l Praino. Até ten strator de aire cuntaminado i filtro para esse aire salir para la rue, limpo.
L filtro
Ls pordutos stan bien arrumados i cun todas las cundiçones, cumo se puode ber por l retrato i hai todas las medidas de sigurançia. Puorta anti-fuogo, stintor i sinal sonoro para abisar de qualquiera porblema que ponga an risco l ambiente ou la salude de las pessonas.
Las stantes
La puorta anti-fuogo
Fui aporbeitado un balon de l bino que yá nun staba an cundiçones. Falta agora fazer las obras por fuora i ne ls outros balones alredor, para ua sala de probas de bino i outros armazenes. Todo se bai fazendo para que la nuossa Corporatiba tenga feturo. Al lado de ls pordutos químicos, yá hai tamien outo sitio para recebir las ambalages usadas.
L sitio de las ambalages
Ls cungressistas agabórun-mos l bino, mas quedórun tamien cuntentos, an ber ls cuidados que tenemos. Muitos éran ambiantalistas i por esso besitórun tamien la Staçon Biológica Anternacional, de l’outro lado de las arribas. L nome de Sendin bai para muitos paízes de la Ouropa i por mais un buono motibo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
