Este anho fizo-se l purmeiro cumbíbio de sendineses an Lisboua, ourganizado por Hugo i Crizinha Picotés. Stubírun 110 sendineses i fui ua fiesta para muitos, que yá tiempos nun se ancuntrában.
Cumo ne l Porto i an Bregancia, speramos que por todos ls sítios onde haba sendineses, se ampécen a fazer tamien cumbíbios.
Pal anho de la ourganizaçon serán, Elisa Mourinho, Pedro Bárbolo i Armanda Amaro.
Crizinha a recebir ls partecipantes
L HOIJE tamien quijo partecipar i tenie alhá un colaborador para bos poder mostrar todo. Eiqui solo bos damos la nuoba i ponemos alguns retratos, mas ua reportage de l cumbíbio podeis ber-la ne l sitio de ls retratos, onde stan acerca de 50 retratos de quaije todo. Nun screbimos ls nomes de las pessonas, para bos poner a pensar ne ls sendineses que stan fuora de casa.
Ne l cumbíbio até dançórun ls palos
Sendin nun ye solo la Bila, mas tamien l sitio adonde stan sendineses. Ye por esso que debemos tener ourgulho na nuossa tierra, que ten giente por todos ls lados i giente amportante. Mais que ua beç tengo screbido que tenemos i debemos cuntar cun ls sendineses que stan fuora, porque ye tamien neilhes que stá l feturo de Sendin.
Estes stan a falar sendinés
De l cumbíbio fizo parte un jantar i ua parte recreatiba, an que partecípórun bários sendineses. Até ls mais pequeinhos. Fui amportante que habendo sendineses de ls mais bariados ouficios, i de ls mais amportantes serbícios de l Stado, i de la sociadade, alhi éran sendineses ounidos por un nome – Sendin.
L jantar i Armanda ourganizadora pal anho
L grupo coral
Nun deixeis de ir a ber ls retratos i para ls que nun stubírun alhá a ber se bos lembrais de tantos que yá nun bedes hai muitos anhos.
Quien se lembra de l 25 de Abril?
Estes stan a porparar ua nuoba rebolucion
Mas será melhor de música, de amizade, de amor i de bida.
Que retrato melhor poderie guardar para l fin, se nó este:
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
