Die 16 de cada més ye la feira de Mogadouro, ua de las que inda se manténen cun anteresse, yá que la maior parte de las feiras de todo l Praino bai morrendo pouco a pouco. La de Junio ye siempre ua feira buna, pus ye la última antes de las férias. Mas este anho staba un die de chuba i nun habie muita giente.
La feira
Hoije fui a la feira para falar cun las pessonas subre l centenairo de la muorte de Trindade Coelho, un scritor de l Praino i que andou a scola mui acerquita de Sendin, an Trabanca, que ten l termo pegado al nuosso. Quedei a saber que faç die 18 deste més anhos que naciu. Para falar cun la giente i ancuntrar pessonas de bárias tierras, nun hai nada melhor que la feira de Mogadouro.
Las tiendas
Mas para esso hai que ir cedo i andar pul meio de la feira. Al mesmo tiempo hai siempre algo que cumprar. Hoije fui un guarda chuba, porque l de la mie tie era pequeinho para cabermos ls dous i chubie que Dius la daba.
Habie de todo
Mas, l que me lebou alhá, fui Trindade Coelho i del falei cun muita giente. L scritor de ls Meus Amores , bai a ser houmenageado por la Câmara, an Agosto. Stan a correr bárias atibidades, zde un cuncurso literário até sposiçones de libros, mas cuido que será melhor fazer un trabalho subre el, mais cumpleto. Solo bos quiero dezir que amou muito l Praino, la sue giente i l sou termo i até la nuossa léngua mirandesa.
Quien puode nun gustar desto?
L die staba de chuba i cun mala calantriç, mas dou para tirar este retrato. L Praino ye siempre lindo…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
