Quando Pertual joga, an Sendin tamien ye ua fiesta. Para muitos que cuidan que l mundo ye solo l deilhes i nó l cunjunto de muitas cousas, de muitas eideias, de muitas çfrencias, de cousas que nin mos damos cunta, l jogo de la bola ye perder tiempo. Esses ye que pérden tiempo a querer un mundo que nun eisiste. Un mundo solo a la sue medida.
Esto ye un cachico de l mundo
Todas las atibidades, mesmo aqueilhas de que nun gustamos, mas que eisísten, fázen parte de l mundo. Quien somos nós para julgar? Quien somos nós para dezir l que ye melhor? Será que esses saberán quien son eilhes? You si que sei quien sou i l que son eilhes, somos todos un cachico de la bida i deilha todos fazemos parte.
Todo l cachico de l mundo ye lindo
Esta alegrie ye que faç l mundo ser melhor, se cada un de nós fazir l sou cachico melhor, l todo será melhor. I naide pense que puode anterferir ne l cachico de ls outros, cuntente-se cul sou i se quier que todo seia melhor, ten que anterferir ne l sou cachico i yá nun fará pouco.
Ne l anterbalo
Ende stá cumo ls jogadores, al fazéren la sue parte ser melhor, fazírun la nuossa ser tamien. Inda hai quien pense que la sue parte quedou eigual, que l golo nada l aporbeitou, mas fui solo la sue parte que quedou eigual, mas l todo quedou melhor.
L ampeço de la segunda parte
Ls bumbeiros mais ua beç stan al serbício de Sendin i Sendin bibe i cuntina a ser ua familha mais ounida i melhor. Pena que inda haba spritos malignos a baguear pul mundo…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
