Ampeçórun hoije ls debates subre l zambolbimiento antegrado, an Sendin i que se farán durante ls meses de Junho i Julio. L purmeiro fui subre las politicas culturales de las autarquies i tubo cumo ourador l persidente de la Câmara de Miranda de l Douro i fúrun moderadores, Mario Correia i Jesé Almendra.
La mesa
L debate fui ne l salon de ls bumbeiros de Sendin i cumo fui l purmeiro, tubo alguas falhas, mas fui animado i dou para ber que estes debates fazíen falta i ban a ser muito amportantes. L próssimo será subre turismo, ne l die 27 deste més i será ourador Carlos Ferreira.
L persidente a falar
De l debate quedórun alguas cousas amportantes i que ténen que ser bien studadas, l porblema de l pólo de la Ounibersidade, que ten que se birar para outras balencias i que deberá cuntar cun la Ounibersidade de Salamanca, fui un que se tratou. Cumo Miranda ye ua cidade sossegada ye eidial para la ambestigaçon.
La giente que stube persente
I stában cun atento
Outra de las cunclosones, fui que ls pribados ténen que botar mano de las potencialidades de las bariadas ouferendas culturales i tratar de las bender. Hai que fazer rendir las struturas que yá hai criadas por todas las aldés de l cunceilho. Muito hai que fazer, mas l mais amportante ye saber que muito yá stá a ser feito.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
