Ls alunos finalistas de l Ciclo de Sendin i cumo bos habie dito yá, fazírun ua pieça de triato para l pobo de Sendin, quien podie daba ua ajuda para l biaije de fin de anho, que fázen todos ls anhos. La Câmara ajuda cun l autocarro i assi yá nun custa tanto als pais.
La giente que fui al triato
La pieça era –L Magnífico Reitor- de Freitas do Amaral i trataba de la relaçon antre reitor, porsores i comisson de alunos, de ua Ounibersidade ne l tiempo de l anterior regime. Fui anteressante ber la realidade de outros tiempos i poder cumpará-la cun l que se passa hoije nas nuossas Ounibersidades i scuolas.
L senado
L reitor staba cun l poblema de las perpuostas de ls alunos que yá querien mais lhiberdade, mas ls porsores i l goberno nun querien abrir mano de la sue outoridade, mas habie ua porsora mais lhibaral de quien l reitor gustaba. Ls botos nun éran faborábles al reitor, sien l boto dessa porsora.
L reitor i la porsora
Habie que arranjar ua soluçon para quedar de bien cun l goberno i cun ls alunos, por cousa de la porsora. Alhá la cumbenciu a ser eilha a cunseguir ua soluçon i esta cunseguiu que todos quedássen bien. Mas mesmo assi i todo, l goberno nun gustou i cumo nun podie demitir l reitor, que quedou a ser amigo cun ls alunos, promobiu-lo a menistro i assi l tirou- lo de la ounibersidade.
L reitor cun ls alunos
Nun hai muito spácio para cuntar toda la pieça, mas cuido que dá para antender un pouco de cumo se fazien las cousas. Hoije inda bai acuntecendo eigual, por alguns lados.
La anterpretaçones fúrun buonas, an special la de l reitor.
L reitor i la sue secretária
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
