L die de San Juan fui celebrado hoije an Sendin cumo se fizo siempre. Ten habido bárias modificaçones, mas hai siempre ua rue, que faç l San Juan cumo ye questume. L HOIJE yá uns dies que staba atento i nun faltou al San Juan de la Rue de las Scalabadas. Todo staba pronto i nun faltaba nada.
La rue cun las bandeiras
Ls San Juanes secos para la fogueira
L cumbibio de toda la rue i de ls familhiares fui antes de se fazer la fogueira i nun faltou de comer i bober. Las sardinas assadas i l bino caseiro, fúrun l prato percipal, mas la fogueira i las cantigas de l San Juan benírun a seguir.
A la ruoda de la fogueira
Las cantigas tradicionales nun podien faltar i nuobos i bielhos cantórun:
San Juan para ber las moças,
Fizo ua fuonte de prata.
Las moças nun ban a la fuonte,
San Juan todo se mata.
Uma moça a saltar a fogueira
I Moreira
Apuis fui l saltar de la fogueira i nuobos i bielhos todos quejírun saltar. Cada un pedie algo a San Juan quando íban a saltar. Mas ls que nun tenien nada que pedir, saltában tamien, para mostrar las hablidades.
Un moço a saltar la fogueira
I Eimília
Na fogueira ye questume queimar las yerbas de San Juan, ls marrolhos i ls San Juanes. Hai quien ponga outras yerbas i todo ye feito para afumar ls que sáltan i quieren afastar ls males de l mundo. La tradiçon de saltar la fogueira ye un ritual mui antigo i debe tener ourige ne ls tiempos de ls pobos pré-romanos.
Ourquidia a saltar la fogueira
Tamien saltában als pares
Poque todo bai eiboluindo i zde que benga a traer algo mais, para que las tradiçones se manténgan, nun faç mal, l as ties fazírun un café para ls que quejíssen i àqueilha hora, nun stubo nada mal. La nuite de San Juan fui ua fiesta de familha, que ye l que ten que ser antre sendineses. Mas ne ls retratos bos mostrarei todo.
Las ties a dar l café
Hai muita tradiçon que muitos nunca bibírun ou yá squecírun, por esso l Hoije las bai mostrando i relembrando.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
