Ne l sitio de las eiras, onde dantes se jogaba la bola, na frente de la Casa de la Criança Mirandesa, na rue que hoije se chama Pe. Chico, queda l Lar. Cumo se stan a fazer obras alhi al lado, l Hoije fui a besitar ls nuossos mais bielhos, que stan alhi. Fui anteressante cumo eilhes gustórun de falar i lembrar muita cousa.
La rue de l Pe. Chico i l Lar de l lado squierdo
Mas l mais anteressante fui ber las buonas condiçones de l Lar i l cuidado cun que son tratados. Na antrada ten un trabalho an madeira, feito por Domingos Nobre. Falei cun el subre ls trabalhos de ls tiempos an que faziemos sposiçones de las sues obras. Yá passórun muitos anhos, el deixou de fazer mais trabalhos, mas you, anquanto puoda, bou screbindo i mostrando, para que quede un decumento scrito.
La nuossa eigreija, an madeira, de Domingos Nobre
Un de ls maiores porblemas de ls lares ye mantener atibidades cun ls idosos, mas la sociadade pouco faç por esso. Ténen que ser las anstituiçones a fazer l que deberie ser feito por l Stado. Mas assi i todo, alhi funciona ua scuola para ansinar a screbir. Uns yá nun puoden, outros nun ténen pacencia i uns poucos alhá ban tentando.
Un grupo de ls que inda sínten fuorça para daprender
Puode parecer algo sien sentido, mas hai que fazer todo para dar un pouco de sprança a quien inda tenga bida. I siempre hai quien rejista i faga por lutar. La maiorie yá tenie ido a comer, mas estas trés cuntinában a screbir.
Las rejistentes
Cumo sabien que you era porsor, quejírun mostrar cumo yá íban screbindo. Bale siempre la pena fazer algo por ls outros, mesmo l que a nós mos parece quaije nada, para eilhes ye muito.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
